Ш. ЗУҲУРОВ БА ҶАКАРТА РАФТ

       Душанбе,13 декабр.(АМИТ «Ховар», Марзия Саидова).-Субҳи имрӯз ҳайати парлумонии Ҷумҳурии Тоҷикистон таҳти роҳбарии Раиси Маҷлиси намояндагони Маҷлиси Олии ҷумҳурӣ  Шукурҷон Зуҳуров ба пойтахти Ҷумҳурии Индонезия шаҳри Ҷакарта рафт. Мавриди зикр аст, ки ин нахустин сафари ҳайати парлумонии Тоҷикистон ба Индонезия буда, ҳадафаш тавсеаи ҳамкориҳои парлумонии Тоҷикистону Индонезия аст.      Дар ҷараён сафар ба Индонезия Шукурҷон Зуҳуров бо роҳбарону намояндагони баландпояи ҳукумат ва парлумони ин кишвар мулоқот намуда, масъалаҳои тақвияти ҳамкориҳои мутақобилан судманди Тоҷикистонро бо ин кишвари Осиёии Ҷанубу Шарқӣ баррасӣ менамояд.     Раиси палатаи поёнии парлумони мамлакатро дар сафар раисони кумитаҳои  Маҷлиси намояндагон ҳамроҳӣ менамоянд.       Бояд гуфт, ки байни Маҷлиси намояндагон ва парлумони Индонезия гурӯҳи дӯстии байнипарлумонӣ фаъолият менамояд, ки нақши он дар тақвияти робитаҳои парлумонӣ калон аст.