ТАЪСИСИ СЕХҲОИ ҚАННОДӢ ДАР МӮЪМИНОБОД

Кӯлоб, 9 декабр. (АМИТ «Ховар»,  Сулаймон Холов). – Баланд бардоштани мақоми  зан  дар  ҷомеа,  фаро гирифтани занони хонанишини деҳот   бо  шуғли  доимӣ  ва  ба ин восита беҳтар намудани  сатҳи  зиндагии  шаҳрвандон     аз  ҳадафҳои  асосии Ҳукумати Ҷумҳурии  Тоҷикистон ба  шумор  меравад. Дар ин  замина  як  қатор  барномаҳои  давлатӣ қабул  гардидаанд, ки  барои  амалӣ гардидани  ин  мақсад  мусоидат  менамояд.     Дар ноҳияи  баландкӯҳи  Мӯъминобод, ки  дорои  168  деҳа буда,   беш аз  ҳафтод ҳазор  аҳолӣ дорад,  бо  ҷои  кор  таъмин намудани  занон     мушкилии  асосӣ ба шумор  меравад.  Солҳои охир бо  кӯшиши  ҳокимияти  маҳаллӣ  қисми  зиёди  занони ноҳия  бо  ҷои  кори  доимӣ  таъмин  гардиданд.  Дар  маркази  ҷамоатҳо  ва  деҳаҳои  сераҳолӣ  сехҳои  хурди  гуногун  кушода шуданд, ки то  80  нафар   занонро  бо ҷои  кор таъмин  намуданд.   Чанде пеш бо  дастгирии  ҳокимияти  маҳаллӣ ва барномаи  Ҷонибдории  Инкишофи  Иҷтимоии  Манотиқи  Кӯҳистон  дар  ҷамоати   деҳоти  Боғгаӣ се  адад  сехи  хурд фаъол  гардонида  шуд. Дар  маросими ботантана  кушода   шудани  сехҳои  мазкур  роҳбарияти  ҳокимияти  маҳаллӣ иштирок намуда,  ба  коргарон дастур  доданд, ки  маҳсулоти  хушсифат  истеҳсол намуда,  дар оянда  барои   бунёди чунин сехҳо ва зиёд  намудани ҷойи корӣ кӯшиш намоянд. Бояд  қайд  намуд, ки  баробари кушодани  ин гуна  сехҳо бояд   барои ҷавондухтарони  деҳот курсҳои омӯзиши касбу ҳунар  ташкил    гардад.