ТЕЛЕВИЗИОНИ ВИЛОЯТИ СУҒД 20 СОЛА ШУД

Душанбе, 23 декабр. (АМИТ «Ховар», Бекназари Абӯбакр). — 22 декабри соли равон дар Кохи Рӯдакии шаҳри Хуҷанд таҷлили  ҷашни 20 — солагии телевизиони  вилояти Суғд баргузор гардид, ки дар он раиси вилояти Суғд Қоҳир Расулзода иштирок ва суханронӣ намуд. Раиси вилоят зикр дошт, ки телевизиони вилояти Суғд ҳамқадами Истиқлолияти Ҷумҳурии Тоҷикистон аст ва дар ин фурсат тавонист симои ҳақиқии хешро дар мазҳари таваҷҷӯҳи бинандаи худ пайдо намояд ва рисолати аслии хешро ба иҷро расонад. «Имрӯз мо номи аввалин шахсони масъули телевизион Муҳаббат Мирсаидова, Абдуалӣ Халилов, Илҳоми Ҷамолиён ва даҳҳо нафари дигарро бо камоли эҳтиром ба забон мегирем, ки дар сари дастгоҳи пахши телевизиони вилоят истода, барои ташаккул ва инкишофи он саҳми арзанда гузоштаанд»-қайд намуд Қоҳир Расулзода. Ба кормандони фаъолу собиқадори Идораи телевизиону радиои вилоят ва Маркази техникии он Ифтихорномаҳои мақомоти иҷроияи ҳокимияти давлатии вилояти Суғд ва нишони сарисинагии «Аълочии телевизион ва радиошунавонии Ҷумҳурии Тоҷикистон» супорида шуд. Дар ин бора ба АМИТ «Ховар» аз хадамоти раиси вилояти Суғд иттилоъ доданд.