ЯРМАРКАИ МИНТАҚАВӢ ДАР РАШТ

      Душанбе, 22 декабр.(АМИТ «Ховар», Марзия Саидова).- 24-уми декабри соли 2010 дар бинои Қасри фарҳанги ноҳияи Рашт ярмаркаи минтақавии ҷойҳои кории холӣ ва вазифаҳои озод баргузор мегардад.        Ташаббускори баргузории ярмарка Агентии давлатии ҳифзи иҷтимоӣ, шуғли аҳолӣ ва муҳоҷирати Вазорати меҳнат ва ҳифзи иҷтимоии аҳолии ҷумҳурӣ мебошад.       Ба ярмарка роҳбарони шӯъбаҳои кадрҳои корхонаю муассисаҳо ва дигар корфармоёни ноҳияҳои  Рашт, Нуробод, Тоҷикобод ва  Ҷиргатол даъват шудаанд.       Инчунин, субъектҳои хоҷагидоре, ки иҷозатнома барои фиристодани муҳоҷирони меҳнатиро ба хориҷи кишвар доранд, дар ярмарка иштирок менамоянд.      Ба шахсоне, ки ихтисос надоранд, барои касб омӯхтан ба марказҳои таълимии  Агентии давлатии ҳифзи иҷтимоӣ, шуғли аҳолӣ ва муҳоҷират, роҳхат дода мешавад.      Аз шӯъбаи робитаҳои байналмилалӣ  ва ҷамъиятии Агентии мазкур ба АМИТ «Ховар» иттилоъ доданд, ки ин дуюмин ярмарка аст, ки дар минтақаи Рашт ташкил мешавад. Қаблан моҳи феврали соли равон чунин чорабинӣ созмон дода шуда буд.