ДАРЁФТИ ИСТЕЪДОДҲОИ НАВ ДАР СУҒД

Душанбе, 31 январ. (АМИТ «Ховар», Бекназари Абӯбакр). — Дар Донишгоҳи давлатии ҳуқуқ, бизнес ва сиёсати Тоҷикистон конфронси ХII-уми илмии олимон ва муҳаққиқони ҷавони вилояти Суғд баргузор гардид. Конфронси мазкур бо мақсади дастгирии олимон ва муҳаққиқони ҷавон, тарғиби ҷавонон ба илм, донишандӯзӣ, дарёфти истеъдодҳои нав роҳандозӣ шудааст. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки дар ин конфронс зиёда аз 200 нафар устодон, олимон ва муҳаққиқони ҷавони донишгоҳҳои олии маркази вилоят иштирок намуда, маърӯзаҳои илмӣ карданд. Дар ҷамъбасти чорабинӣ ба 10 нафар олимон ва муҳаққиқони ҷавон барои маърӯзаҳои илмии беҳтарин аз рӯи бахшҳои физика ва риёзиёт, таърих ва фанҳои ҷамъиятӣ, иқтисодӣ, ҳуқуқшиносӣ, сиёсатшиносӣ ифтихорнома ва тӯҳфаҳои хотиравии Раёсати ҷавонон, варзиш ва сайёҳии вилоят супорида шуд.          Инчунин мақолаҳои беҳтарини олимони ҷавон таҳти унвони «Дар пайроҳаи илми муосир»  дар шакли китоб ба табъ расида,  ба ҳамаи  муаллифон супорида шуд.