ГӮШТИ ПАРҲЕЗӢ ЧАНД СОМОНӢ АРЗИШ ДОРАД?

    Душанбе, 4 январ. (АМИТ «Ховар», Лаззат Диловарзод).- Бино ба иттилои сардори Раёсати чорводории Вазорати кишоварзӣ Музаффар Мирзоев, дар ибтидои соли нави 2011 дар хоҷагиҳои деҳқонӣ (фермерӣ) шумораи харгӯш ба 44 ҳазору 300 сар расид. Бо вуҷуди он ки дар ҳамаи минтақаҳои ҷумҳурӣ хоҷагиҳои алоҳидаи харгӯшпарварӣ ба роҳ монда шудааст, аммо шумораи он ҳанӯз ба талабот ҷавобгӯ нест. Гӯшти харгӯш ба гурӯҳи хӯрокҳои парҳезӣ дохил мешавад. Нархи 1кг гӯшти харгӯш дар бозор 40 — 45 сомонӣ арзиш дорад, аз ин рӯ талаботи аҳолӣ ба гӯшти харгӯш хеле кам аст, ба ҷуз чанд ресторани пойтахт, ки дар он аз гӯшти харгӯш хӯроки парҳезӣ тайёр мекунанд . Дар бозори ҷаҳонӣ талабот ба мӯина ва пӯсти харгӯш калон бошад ҳам, аммо дар ҷумҳурӣ корхонаҳои коркарди пӯст ва мӯинаи он вуҷуд надорад ва аз ин ҷиҳат дар кишвар ба ривоҷи харгӯшпарварӣ камтар аҳамият медиҳанд     Айни замон дар хоҷагиҳои харгӯшпарварии ВМКБ беш аз 3 ҳазору 700 сар, дар вилояти Суғд беш аз 11 ҳазор, вилояти Хатлон 20 ва НТҶ 7 ҳазору 290 сар харгӯш парвариш меёбад,- иброз дошт М. Мирзоев ба мухбири АМИТ «Ховар».