НАХУСТИН ҶАЛАСАИ СИТОДИ НАВРӮЗ -2011

    Душанбе, 31 январ.(АМИТ «Ховар», Марзия Саидова). — Нахустин ҷаласаи ситоди шаҳрӣ оид ба омодагӣ ҷиҳати таҷлили Наврӯзи байналмилалии соли 2011 дар Душанбе таҳти раёсати Раиси шаҳри Душанбе Маҳмадсаид Убайдуллоев баргузор шуд. Дар кори ситод муовини Сарвазири ҷумҳурӣ Руқия Қурбонова, кормандони масъули Дастгоҳи иҷроияи Президенти ҷумҳурӣ, вазирони маорифу фарҳанг, ректорони донишгоҳҳои олии дар пойтахтбуда ва санъаткорону ҳунармандон иштирок доштанд.     Раиси шаҳр таваҷҷӯҳи масъулинро ба моҳияти баргузории Наврӯзи байналмилалӣ ҷалб намуда, вобаста аз ҷузъиёти сенарияи тасдиқшуда, ҷиҳати шурӯи корҳои омодагӣ дастурҳои мушаххас дод.    Бо дарназардошти ҷалби васеи иштирокдорон дар барномаҳои театрикунонидаи Наврӯзӣ, ки аз потенсиали донишҷӯён истифода мешавад, муқаррар гардид, ки тибқи нақшаи бо ректорони донишгохҳо мувофиқашуда бе халалдор намудани ҷараёни таълим машқҳои омодагӣ ба роҳ монда шавад.   Раиси шаҳр дастур дод, ки ҷиҳати ташкили хӯроки яквақта ба донишҷӯён, таъмини ҳолати санитарӣ дар машқгоҳ – Наврӯзгоҳи шаҳрӣ (собиқ Ипподром) ва дастгирии молиявию пардохти хароҷоти роҳкиро ба донишчӯён, тадбирҳои воқеӣ андешида шаванд.