НАТИҶАҲОИ САНҶИШИ САНИТАРИЮ ЭПИДЕМИОЛОГИИ МӮЪМИНОБОД

    Мӯъминобод, 20 январ. (АМИТ «Ховар», С.Холов ). – Бино ба иттилои иҷрокунандаи вазифаи сардухтури маркази назорати давлатии санитарию эпидемиологии ноҳияи Мӯъминобод Ҳикматулло Исмоилов дар давоми соли сипаригардида кормандони марказ дар якҷоягӣ бо кормандони прокуратура ва шӯъбаи корҳои дохилӣ 525 санҷиши эпидемиологӣ гузарониданд, ки дар натиҷа бо қарори сардухтури марказ ба 47 нафар шахсони масъул огоҳӣ дода, ба 22 нафар шахсони алоҳида ҷарима баста шуд ва маблағи ҷарима 1180 сомониро ташкил дод.     Ба гуфти манбаъ дар ин муддат фаъолияти якчанд нуқтаи хӯроки умумӣ, нуқтаҳои фурӯши сӯзишворӣ, мағозаҳои дохили бозори марказӣ ва дигар корхонаҳои саноатӣ то ислоҳи камбудиҳо муваққатан боздошта шуд. Мавриди зикр аст, ки кормандони марказ айни ҳол маҳсулоти хӯрокӣ, аз қабили гӯшт, шир, мева, сабзавот, маҳсулоти консервагӣ, нӯшокиҳои спиртӣ ва дигар маҳсулоти ниёзи мардумро аз санҷиши эпидемиологӣ гузаронида, баъдан ба фурӯши маҳсулот иҷозат медиҳанд.     Ҳикматулло Исмоилов афзуд, ки мушкилии асосии кори марказ нарасидани мутахассисон мебошад, зеро ба ҷои 31 нафар ҳамагӣ 8 нафар фаъолият мекунанд. Сабаби нарасидани мутахассисонро дар кам будани маош мебинанд.