РИОЯИ ҲАТМИИ МУҚАРРАРОТИ ҚОНУНИ ҶУМҲУРИИ ТОҶИКИСТОН

    Душанбе, 19 январ. (АМИТ «Ховар», Дилшодаи Ҷонмард).- «Бо мақсади ба стандартҳои ҷаҳонӣ мувофиқ намудани раванди таълим ва тайёр намудани мутахассисони дорои донишу малакаи замонавӣ, муҳайё намудани заминаҳои ҳуқуқӣ дар самти рушди тарбияи томактабӣ, ба талаботи меъёрҳои байналмилалӣ мутобиқ гардонидани низоми таҳсилоти умумӣ, таъмин намудани муассисаҳои таҳсилоти умумии кишвар бо технологияи компютерӣ ва омӯзиши амиқи технологияи иттилоотию коммуникатсионӣ, таъмини муассисаҳои таълимию илмӣ бо кабинетҳои фаннӣ, озмоишгоҳҳои муҷаҳҳази таълимӣ ва илмию таҳқиқотӣ корҳои судманд анҷом дода шуданд»,- изҳори хушнудӣ кард Сарвари давлат.   Барои тақвият бахшидани робитаи оила бо мактаб ва баланд бардоштани ҳисси масъулияти падару модар дар таълиму тарбияи фарзанд чанде пеш лоиҳаи Қонун «Дар бораи масъулияти падару модар дар таълиму тарбияи фарзанд» таҳия ва ба муҳокимаи умумихалқӣ пешниҳод гардид. Ҳадафи асосии ин иқдом тарбияи насли солиму тарбиядида ва ба воя расонидани кадрҳое мебошад, ки ободии ояндаи Тоҷикистони соҳибистиқлол ба дӯши онҳо гузошта хоҳад шуд, гуфт Сарвари давлат.   Президенти мамлакат ба тамоми раисони вилоятҳо ва шаҳру ноҳияҳо супориш дода таъкид намуд, ки муҳокимаи лоиҳаи Қонун «Дар бораи масъулияти падару модар дар таълиму тарбияи фарзанд»-ро ба таври васеъ таъмин намуда, ҳамзамон бо ин, риояи ҳатмии муқаррароти Қонуни Ҷумҳурии Тоҷикистон «Дар бораи танзими анъана ва расму маросимҳо»-ро таҳти назорати доимӣ қарор диҳанд.