САРФАИ 1,5 МЛН. ДОЛЛАР ДАР ДУ СОЛ

Душанбе, 31 январ. ( АМИТ «Ховар», Сангзода  Муслиҳиддин). —  Бино ба гуфти  директори  муассисаи давлатии  Маркази идоракунии лоиҳаи «Рушди деҳот» Усмон  Сабзов  дар самти барқарорсозии  инфрасохтор ба ҷои 50-60 зерлоиҳаи   нақшавӣ зиёда аз 125 зерлоиҳа  пешниҳод гардид, ки  онҳо омӯхта шуда, лоиҳаҳои  беҳтарин  ба Бонки Рушди  Осиё пешниҳод шуданд.   Аз ҷумла,  36 зерлоиҳа аз ноҳияи Рӯдакӣ, 9 зерлоиҳа аз ноҳияи Варзоб,  30 зерлоиҳа аз шаҳри Ваҳдат, 10 зерлоиҳа аз шаҳри Роғун, 40 зерлоиҳа аз ноҳияи Файзобод омода гардиданд.  Мавсуф  зикр намуд, ки   аз рӯи ин зерлоиҳаҳо  дар  се иншоот, аз ҷумла иншооти дохилихоҷагии «Дашти бед», деҳаи  Навободи ноҳияи Ваҳдат,  инчунин  «Сохтмони  хати  оби  нӯшокӣ» дар деҳаи  Тахти алифи ҷамоати  Чашмасори  ноҳияи Файзобод корҳои  амалӣ оғоз гардиданд.    Усмон Сабзов гуфт, ки теъдоди коршиносони байналмилалиро  кам намуда  ба  ҷои онҳо 13 нафар мутахассисони маҳалиро бо ҷойи  кор таъмин намудем. Дар давоми ду сол зиёда аз 1,5 млн. доллари ИМА маблағ сарфа   шуд ва  аз ҷониби дигар самаранокии корҳо  баланд гардид.