100 ҲАЗОР НАФАР БО КОРТҲОИ ПЛАСТИКӢ ТАЪМИН МЕГАРДАНД

  Душанбе, 7 феврал. (АМИТ «Ховар», Лаззат Диловарзод). — Аз моҳи январи соли ҷорӣ Вазорати меҳнат ва ҳифзи иҷтимоии аҳолӣ дар ҳамкорӣ  бо Бонки давлатии амонатгузории «Амонатбонк» бо мақсади тавассути кортҳои пластикӣ ҷорӣ намудани шакли нави хизматрасонӣ ба нафақгирон  чорабиниҳои зарурӣ гузаронид.   Дар назар аст, ки соли 2011 100 ҳазор нафар нафақагирони шаҳрҳои Хоруғ, Хуҷанд, Истаравшан, Исфара, Табошар, Ёвон Норак, Ваҳдат ва Турсунзода бо кортҳои пластикӣ таъмин мегарданд. Ҳамчунин,  соли ҷорӣ дар ду ноҳияи пилотӣ: — Ёвон ва Истаравшан пардохти хизматрасонии коммуналӣ, аз ҷумла обу барқ  тавассути кортҳои пластикӣ ба роҳ монда мешавад. Дар сурати муваффақ шудан шаҳру ноҳияҳои боқимондаи ҷумҳурӣ низ тадриҷан ба ин шакли нави хизматрасонӣ мегузаранд.          Бо вуҷуди ҳама чорабиниҳои осон гардонидани хизматрасонӣ нафақагирони солхӯрда аз он шикоят доранд, ки рақамҳои заруриро дар ёд нигоҳ дошта наметавонанд ва аз кӯмаки дигарон  дар чидани ин рақамҳо   истифода карданро барои худ зарур намешуморанд, зеро дар ин сурат махфияти рақамҳои кортҳо аз  байн меравад.