КИШВАРҲОИ СҲШ БО ТЕРРОРИЗМ ДАСТ БА ГИРЕБОН МЕГАРДАНД

  Душанбе, 16 феврал.(АМИТ «Ховар», Марзия Саидова).- Конвенсияи Созмони ҳамкории Шанхай /СҲШ/ бар зидди терроризм, ки яке аз санадҳои муҳими ба имзо расонидаи кишварҳои аъзои СҲШ аст, 16 феврал дар палатаи поёнии Тоҷикистон тасдиқ гардид.   Мавриди зикр аст, ки ин санади муҳим соли 2009 дар шаҳри Екатеринбурги Федератсияи Русия ба имзо расида аз 37 модда иборат аст.    Зимни шарҳи ин санад Саймӯъмин Ятимов Раиси Кумитаи давлатии амнияти Ҷумҳурии Тоҷикистон зикр кард, ки Конвенсия бо мақсади густариши ҳамкориҳои давлатҳои аъзои СҲШ дар мавриди андешидани тадбирҳои пешгирӣ ва тақвият додани мубориза бар зидди терроризм бо назардошти риоя намудани волоияти қонун ва эътирофи арзишҳои демократӣ, ҳуқуқу озодиҳои инсон ва меъёрҳои ҳуқуқи байналмилалӣ, ба ҷавобгарии ҷиноятӣ кашидани шахсони воқеию ҳуқуқӣ, ки чунин ҷиноятҳоро содир менамоянд, ба имзо расидааст.  С. Ятимов афзуд, ки дар моддаҳои 7 ва 20-и Созишнома андешидани тадбирҳо бар зидди терроризм, супоридани маҳкумшудагон ва расонидани кӯмакҳои ҳуқуқӣ, пешниҳоди маводи зарурӣ ба ҳамдигар, иҷрои дархости тарафҳо, иштирок дар чорабиниҳои оҷилӣ-ҷустуҷӯӣ ва ҳаракатҳои тафтишотӣ дар қаламрави тарафи дархостшаванда пешгӯӣ шудаанд.