ТӮҲФАҲОИ ҶАШНӢ

Душанбе, 5 феврал. (АМИТ «Ховар», Ҳотам Рабиев). — Дар доираи омодагиҳо ба ҷашни 100-солагии зодрӯзи Қаҳрамони Тоҷикистон, шоири бузург устод Мирзо Турсунзода аллакай як силсила китобҳои гуногун ба табъ расиданд ва қисми дигар омодаи нашранд. Аз ҷумла, китобҳои «Қаҳрамони халқ ва ифтихори миллат», «Турсунзода дар мактаб»-и Султонмуроди Одина, «Шеъри Турсунзодаву ин обшорон зинда бод»-и Ҷамолиддин Саидзода, «Солҳое, ки ман ҷавон будам»-и Файзалӣ Шукур, «Фарзанди қарни ХХ»-и Равшани Ҳамроҳ ва Иброҳими Наққош дастраси хонандагон гардиданд. Тибқи нақшаи нашриёти «Адиб» мунтахаби ашъори Мирзо Турсунзода бо номи «Сурудам ҳофизи рози дили ман» бо теъдоди зиёд нашр мешавад.