ЗАХИРАИ МАҲСУЛОТ НАРХРО КОҲИШ МЕДИҲАД

  Душанбе, 14 феврал.(АМИТ «Ховар», Марзия Саидова).- Дар ояндаи наздик бо таҷдиди сохтори КВД «Савдо ва бозорҳои шаҳри Душанбе» КВД «Шоҳмансур», «Баракат» ва «Деҳқон» таъсис дода шуда, барои захираи маҳсулот дар бозорҳо мутаносибан захирагоҳи собиқ бозори «Баракат» ба бозори «Саховат», КВД «Фароғат» ба бозори «Деҳқон» ва Лучоб ба бозори «Шоҳмансур» вобаста мешаванд.    Ин масъала дар ҷаласае, ки дар ҳузури Раиси шаҳри Душанбе Маҳмадсаид Убайдуллоев оид ба ғановати бозори истеъмолӣ ва коҳиш додани болоравии нархи маҳсулоти ниёзи аввал дар бозорҳои пойтахт баргузор шуд, баррасӣ гардид. Ин тадбир бо мақсади баланд бардоштани масъулияти директорони бозорҳое, ки ба моликияти коммуналии шаҳр мансуб мебошанд, андешида шуда, инчунин барои ташкили фаъолияти бонизом, захираи саривақтӣ ва пешниҳоди маҳсулот дар чор фасли сол бо нархҳои воқеӣ ба истеъмолкунандагон мусоидат менамояд.   Тибқи иттилои котиби матбуотии Раиси шаҳри Душанбе Шавкат Саидов вобаста ба ин масъала А. Ризоев директори кулли КВД «Савдо ва бозорҳои шаҳри Душанбе», ки ҳамзамон роҳбари Корхонаи фаръии «Бозори Шоҳмансур» аст, муваззаф гардид, ки барои таъсиси хоҷагиҳои ёрирасони захиракунандаи маҳсулот тадбирҳои амалӣ андешад.