ИСТИҚБОЛИ НАВРӮЗ БО ҲАВОИ ОФТОБӢ

   Душанбе, 17 март.(АМИТ «Ховар», Марзия Саидова). — «Рӯзҳои  истиқболи ҷашни байналмилалии Наврӯз -20-21-уми  март ҳаво дар ҷумҳурӣ  бебориш ва офтобӣ буда, ҳарорати ҳаво то 18 дараҷа гарм мешавад». Дар ин хусус ба АМИТ «Ховар» Ҷамила Байдуллоева, сардори Маркази обуҳавошиносии ҷумҳурӣ иттилоъ дод. Мавсуф гуфт, ки боридани барф  санаи 17 март  дар ҷумҳурӣ дар натиҷаи раванди воридшавии ҳавои сард  ба амал омада, он чун солҳои қаблӣ ҳавои муқаррарист ва аз шиддатёбии равандҳои атмосферӣ шаҳодат медиҳад.    Бо вуҷуди оне, ки рӯзҳои 13-14 март дар ҷумҳурӣ ҳарорати ҳаво то 30 -31 дараҷа боло рафт, вале рӯзи 16-уми март ҳарорат якбора паст фаромада дар ноҳияҳои кишвар аввал борон ва баъдан рӯзи 17 март барфи тар борид.    Бояд гуфт, ки боридани барфи тар   барои соҳаи кишоварзии кишвар зарар намерасонад, афзуд Ҷамила Байдуллоева. Боридани барф дар фасли баҳор дар моҳи майи соли  1980 (барфи тар) ва 5 апрели соли 1994, ки баландиаш ба 10 см мерасид, дар ҷумҳурӣ ба қайд гирифта шудааст, ки он барои иқлими Тоҷикистон ғайримуқаррарӣ буд.    19 март дар бархе аз ноҳияҳои алоҳидаи ҷумҳурӣ  борон меборад. Ҳарорати ҳаво шабона  аз 1 дараҷа хунук то 1 дараҷа гарм, рӯзона 15-17 дараҷа гарм мешавад.              Рӯзҳои таҷлили ҷашни Наврӯз ҳаво дар миқёси ҷумҳурӣ 15-20 дараҷа гарм, дар кӯҳҳо   4-9 дараҷа гарм ва дар минтақаҳои баландкӯҳи  кишвар  аз 3 дараҷа хунукӣ  то 2 дараҷа гарм мешавад.