ОҒОЗИ ТАҶЛИЛИ НАВРӮЗ

 Кӯлоб,  7 март. (АМИТ «Ховар»,  С.Холов).- Бо  қарори  раиси ноҳияи   Восеъ  Султон Валиев  таҷлили  Наврӯзи  Аҷам дар  ҷамоатҳои  деҳоти   ноҳия  оғоз  гардид. Лола  Ғуломова- ҷонишини  раиси  ноҳия оид ба  корҳои  идеологӣ  вобаста  ба  ин  мавзӯъ  гуфт, ки  айни ҳол  дар  деҳаи  Навободи  ҷамоати  деҳоти Тугарак  ин  иди  фархунда  ҷашн  гирифта  шуд ва  дар  он  намояндагони  мақомоти  иҷроияи  ҳокимияти  давлатии ноҳия  ширкат  варзиданд. Зимни баргузории чорабинӣ  мардони  саховатпешаи  ноҳия  ба  3  нафар  иштирокчии ҶБВ,  4  нафар  беморони  бистаригардида,  13  нафар мардуми камбизоат тӯҳфаҳои  молӣ  тақдим  намуданд.         Дар  чорабинӣ  либосҳои  қадимаи  ориёӣ ба маърази тамошо  гузошта шуда, инчунин, беш  аз  5 навъи  хӯроки  миллӣ пешкаши  шаҳрвандон гардид. Гуфта  мешавад, ки чунин  чорабиниҳои фарҳангӣ  дар  62   деҳаи  ноҳия мегузаранд.