Ҳамкориҳои судманди ҶСП «ИнтерАгро» ва Вазорати кишоварзӣ

Душанбе, 29 июл. (АМИТ «Ховар», Дилшодаи Хайруллоҳ).- Имрӯз дар Вазорати кишоварзии Ҷумҳурии Тоҷикистон вохӯрии вазири кишоварзӣ Қ.Қосимов бо Директори генералии ҶСП «ИнтерАгро»-и вилояти Свердловски Федератсияи Русия доир гардид. Мақсади вохӯрӣ аз муҳокимаи масъалаҳои ҳамкорӣ дар соҳаи парвариши картошкаи пешпазак ва судури минбаъдаи он аз Ҷумҳурии Тоҷикистон иборат буд. Дар оғози вохӯрӣ вазири кишоварзӣ Қ. Қосимов ҳамкориҳои дуҷонибаро бо ҷамъияти мазкур дар рушди соҳаи кишоварзӣ мусбат арзёбӣ намуда, барои дастгирӣ ва ҳамкориҳо ба Ширкати Давлатии «УралПромСервис», ки ба Ҷумҳурии Тоҷикистон таҷҳизоти махсуси кишоварзӣ, маводи баландсифати тухмӣ, нурӣ ва маводи кимиёвӣ ворид менамояд, изҳори минатдорӣ намуд. Ёдовар бояд шуд, ки ҶСП «ИнтерАгро» дар асоси Созишномаи миёни вилояти Свердловски Федератсияи Русия ва Ҳукумати Ҷумҳурии Тоҷикистон оид ба ҳамкориҳои тиҷоратию иқтисодӣ, илмиву фарҳангӣ аз 1 феврали соли 2004 дар Тоҷикистон таъсис гардидааст. ҶСП «ИнтерАгро» бо хоҷагиҳои тухмипарварии ноҳияҳои Панҷ, Кӯҳистони Мастчоҳ, Ҷиргатол ва Рашт ҳамкории зич дошта, айни замон аз Вазорати кишоварзии Ҷумҳурии Тоҷикистон хоҳиш дорад, ки барои ҳамкорӣ намудани он бо Институти боғдорӣ ва сабзавотпарварии Академияи илмҳои кишоварзии Тоҷикистон мусоидат намояд.