Донишҷӯёни бозгашта дар куҷо таҳсил доранд?

Душанбе, 26 июл.(АМИТ «Ховар», Марзия Саидова).-60 нафар шаҳрвандони Тоҷикистон, ки аз кишварҳои хориҷӣ ба ватан баргардонида шудаанд, алҳол дар курсҳои Донишкадаи исломии Тоҷикистон ба таҳсил фаро гирифта шудаанд. Ин матлабро Умаралӣ Назаров, ректори Донишкадаи исломии Тоҷикистон зимни нишасти матбуотӣ ба хабарнигорон иброз дошт. Мавсуф гуфт, ки ин донишҷӯён қаблан дар муассисаҳои таълими динии кишварҳои Мисри Араб, Арабистони Саудӣ, Либия, Сурия, Яман, Эрон ва Донишгоҳи байналмилалии Африқо таҳсил мекарданд. Ба ақидаи Ректори Донишкадаи исломии Тоҷикистон «яке аз проблемаҳое, ки ҷиҳати ба таҳсил фаро гирифтани донишҷӯён дар Донишкади исломӣ халал мерасонад, ин ҳуҷҷатҳои зурурӣ, аз ҷумла шаҳодатномаи таҳсил надоштани донишҷӯёни аз хориҷ баргашта мебошад». Бояд тазаккур дод, ки дар асоси супориши Сарвари давлат аз ҷумлаи 2 ҳазору 413 нафар донишҷӯёни ба таври ғайрирасмӣ дар кишварҳои хориҷӣ таҳсилдошта 1 ҳазору 951 нафарашон ба ҷумҳурӣ баргардонида ва то имрӯз 130 нафари онҳо ба таҳсил фаро гирифта шудаанд. Яке аз сабабҳои асосии аз кишварҳои хориҷӣ ба ватан баргардонидани ҷавонони тоҷик ба баъзе гурӯҳҳои динию ифротгаро гаравидани онҳо будааст.