Моҳиҳои хушзоти «Суғдмоҳӣ»

Душанбе, 16 июл. (АМИТ «Ховар», Покиза Маҳмадбекова). — Дар Ҷамъияти саҳҳомии кушодаи «Суғдмоҳӣ» намунаҳои гуногуни моҳиҳои хушзот парвариш меёбанд. Дар давоми шаш моҳи соли ҷорӣ моҳидорони хоҷагии мазкур 21,82 тонна моҳӣ сайд намуданд, ки маблағи фурӯши онҳо 147 ҳазору 593 сомониро ташкил дод. Ба буҷет маблағи беш аз 110 ҳазор сомонӣ маблағ ворид гардидааст.Дар нимаи аввали соли 2011 ба мардуми вилоят ва корхонаҳои ҷамъияти саҳҳомӣ 42,17 тонна ва ё ба маблағи 221 ҳазору 770 сомонӣ моҳӣ ва маҳсулоти моҳигӣ фурўхта шуд.Бояд қайд кард, ки дар давраи наслгирӣ 23,3 миллион дона кирмина бароварданд, ки аз онҳо 5,6 миллион донаашро ба хоҷагиҳои моҳипарвар фурўхта, 17,7 миллион дона барои нигоҳубин ба ҳавзҳои хоҷагӣ рехта шуд.Барои нигоҳубин ва азнавбарқароркунии захираҳои баҳр ва дарё ба ҳавзҳои хоҷагӣ 88,8 ҳазор дона моҳича ворид гардид. Аҳли хоҷагӣ кўшиш доранд, ки истеҳсоли моҳиро сол аз сол дар миқёси вилоят зиёд намуда, аҳолиро бо маҳсулоти моҳигӣ хубтар таъмин намоянд.Дар ин бора ба АМИТ «Ховар» аз аз Хадамоти матбуотии Раиси вилояти Суғд иттилоъ доданд.