«Зебосанам» дар Кохи Ваҳдат

Душанбе, 16 июл. (АМИТ «Ховар», Марҳабо Зунунова). – Муассисаи давлатии Телевизиони «Сафина» ният дорад, ки моҳи августи соли ҷорӣ даври ниҳоии озмуни телевизионии «Зебосанам»-ро дар маҷмааи «Кохи Ваҳдат»-и пойтахт баргузор намояд. «Мо мехоҳем озмуни ҷамъбастии «Зебосанам» дар сатҳи баланди ташкилӣ баргузор гардад. Якҷоя бо тамошобинон ва мухлисони ин шоу- барномаи машҳур аз зебоӣ, дониш, нафосат ва зарофати духтарони барнома завқ барем», — гуфт зимни нишасти матбуотӣ директори Муассисаи Давлатии Телевизиони «Сафина» Лутфулло Давлатов ба хабарнигорон. Л. Давлатов зикр намуд, ки «Зебосанам» лоиҳаи навбатии баранда ва муҳаррири боистеъдод Дилафрӯз Сатторова мебошад. «Мақсади таъсиси ин озмун на танҳо интихоби тоҷикдухтари аз ҳама зебо аст, балки таблиғи фарҳанги тоҷик, эҳёи анъанаҳои миллӣ оид ба зебогии зан, аз ҷумла мӯйи дароз, латофат, хоксорӣ ва шармгинӣ мебошад» — изҳор намуд директори шабака.