Қабули қонунҳои нав аз ҷониби Президенти ҶТ

Душанбе, 4 август. (АМИТ «Ховар»).-2 август, Президенти Ҷумҳурии Тоҷикистон як қатор қонунҳоро, ки аз тарафи Маҷлиси намояндагон қабул гардида, Маҷлиси миллӣ онҳоро ҷонибдорӣ намудааст, ба имзо расонид. Қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи низоми иҷозатдиҳӣ», «Дар бораи рўзҳои ид», «Дар бораи иттифоқҳои касаба», «Дар бораи ҳифзи муҳити зист», «Дар бораи суғуртаи пасандозҳои шахсони воқеӣ», дар бораи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон, Кодекси ҷиноятии Ҷумҳурии Тоҷикистон, Кодекси мурофиавии ҷиноятии ҷумҳурии Тоҷикистон аз ҷумлаи онҳо мебошанд.Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» бо назардошти талаботи ҷомеа ҷиҳати баланд бардоштани масъулияти падару модар, мақомоти давлатӣ, муассиса ва дигар ташкилотҳое, ки фаъолияташон ба масъалаи мазкур вобаста аст, таҳия ва қабул карда шудааст. Меъёрҳои қонуни мазкур барои рушди инсони комил, таҳкими сармои зеҳнӣ, таълиму тарбияи фарзанд дар рўҳияи инсондўстӣ, ифтихори ватандорӣ, эҳтироми арзишҳои миллӣ, умумибашарӣ ва фарҳангӣ, инчунин ҳифзу ҳимояи ҳуқуқу озодиҳои фарзанд равона карда шудааст.Қонуни Ҷумҳурии Тоҷикистон «Дар бораи низоми иҷозатдиҳӣ» қонуни нав буда, номгўи фаъолиятеро, ки таҳти амали он қарор мегирад, асосҳои ҳуқуқӣ, ташкилӣ ва иқтисодии низоми иҷозатдиҳӣ, тартиби додани ҳуҷҷатҳои иҷозатдиҳиро ба субъектҳои фаъолияти соҳибкорӣ муайян ва шаклҳои ҳуҷҷатҳои иҷозатдиҳиро муқаррар карда, ба ҳифзи ҳуқуқу манфиатҳои қонунии шаҳрвандон ва рушди соҳибкорӣ нигаронида шудааст.Қонуни Ҷумҳурии Тоҷикистон «Дар бораи суғуртаи пасандозҳои шахсони воқеӣ» асосҳои ҳуқуқӣ, ташкилӣ ва молиявии низоми бимакунонии пасандозҳои шахсони воқеӣ, аз ҷумла тартиби таъсис ва фаъолияти Хазинаи суғуртаи пасандозҳои шахсони воқеиро муқаррар карда, ҳимояи ҳуқуқ ва манфиатҳои пасандоздорон ва таҳкими боварии аҳолиро ба низоми бонкии Ҷумҳурии Тоҷикистон таъмин менамояд. Қонунҳои ба имзорасида ба таъмини ҳуқуқу озодиҳои инсон, ҳимояи манфиати давлату ҷамъият, шахсони ҳуқуқӣ, беҳдошти вазъи иқтисодию иҷтимоии кишвар, таҳкими муносибатҳои ҷамъиятӣ ва тартиботи ҳуқуқӣ равона карда шудаанд.Матни пурраи қонунҳои баимзорасида дар рўзномаҳои расмии кишвар ба нашр расонида мешаванд.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.