ДАР ХОРУҒ ЯРОҚҲОРО ИХТИЁРАН СУПОРИДАНД

Душанбе, 15 август. (АМИТ «Ховар», Лутфия Эшонқулова). – Сокинони силоҳдори шаҳри Хоруғ 34 адад яроқи оташфишонро ихтиёран ба мақомот супориданд. Аз маркази матбуоти Вазорати корҳои дохилии ҷумҳурӣ ба мухбири АМИТ «Ховар» иттилоъ доданд, ки дар рафти корҳои фаҳмондадиҳӣ аз ҷониби кормандони мақомоти корҳои дохилӣ оид ба иҷроиши Фармони Президенти Ҷумҳурии Тоҷикистон таҳти №2 аз 02.12.1994 дар маҳаллаҳои шаҳри Хоруғ аз тарафи сокинони маҳаллаҳои шаҳр ба таври ихтиёрӣ, бе номнавис кардани ному насаб, 34-адад яроқи оташфишон ба анбори нигоҳдории яроқу аслиҳаи шӯъбаи таъминоти моддӣ-техникӣ ва низомии Раёсати корҳои дохилии ВМКБ супорида шуд. 4 адад пулемёти дастии Калашников, 11 адад автомати Калашников, 1 адад карабини СҚС ЮН №-4252, соли бароришаш 1946, 3 адад карабини истеҳсоли хориҷӣ, 3 адад карабини тамғаи «Бур»-и истеҳсоли Британияи Кабир, 11 адад таппончаҳои тамғаи «Макаров», 1 адад таппончаи истеҳсоли хориҷии «ERMA WARKE» аз ҷумлаи онҳо мебошанд.