Мактаби мубоҳисавии тобистонаи экологӣ дар шаҳри Қайроққум

Душанбе, 11 август. (АМИТ «Ховар», Покиза Маҳмадбекова). — Ташкилоти ҷамъиятии «Гурӯҳи ҷавонони муҳофизи муҳити зист» дар ҳамкорӣ бо Раёсати ҳифзи муҳити зисти вилояти Суғд ва дастгирии молиявии Сафорати ИМА дар Ҷумҳурии Тоҷикистон дар истироҳатгоҳи «Орлёнок»-и шаҳри Қайроққум мактаби мубоҳисавии тобистонаи экологиро таъсис дод. Ба мухбири АМИТ «Ховар» аз Хадамоти матбуоти Раиси вилояти Суғд иттилоъ доданд, ки дар ин мактаб 60 нафар наврасон — дӯстдорони табиат аз тамоми шаҳру ноҳияҳои вилоят ҷамъ омада, тибқи лоиҳаи «Мубоҳисаҳои телевизионӣ – усулҳои ҷалби ҷавонон дар раванди қабули қарори масъалаҳои иҷтимоӣ — экологӣ» донишҳои экологии худро сайқал медиҳанд ва ҳам истироҳат мекунанд.Нӯҳ сол аст, ки ин ташкилоти ҷамъиятӣ дар соҳили Баҳри Тоҷик мунтазам истироҳатгоҳи тобистонаи маърифати экологӣ — «Хонаи сабзи мо»-ро бо мақсади ба ҷавонон омӯзонидани истифодаи самараноки табиат ва фаъолияти ба ҳифзи табиат равонагардида ташкил менамояд.Аллакай беш аз 600 нафар ҷавонон аз шаҳру ноҳияҳои вилоят, инчунин аз шаҳрҳои Душанбе, Қӯрғонтеппа, Кӯлоб, ноҳияҳои Шаҳритӯс, Қубодиён ва аз Ҷумҳурии Қирғизистон дар истироҳатгоҳи экологии «Хонаи сабзи мо» фароғат намуданд.