Муроҷиати шаҳрвандон набояд беҷавоб монад

Душанбе, 5 август.(АМИТ «Ховар», Марзия Саидова).-«Муроҷиати шаҳрвандон ҳамчун василаи иштирок дар қабули қарорҳо» таҳти чунин унвон дар Душанбе бо иштироки намояндагони сохторҳои давлатӣ, васоити ахбори омма ва созмонҳои байналмилалии ҳифзи ҳуқуқ сӯҳбати мизи гирд баргузор гардид. Чорабинии мазкур бо ибтикори Анҷумани миллии васоити ахбори оммаи мустақили Тоҷикистон /АМВАОМТ/ ва иттиҳодияи ҷумҳуриявии ҷамъиятии «Маркази инъикос ва тарғиби зидди фасод» созмон дода шуд. Назар ба иттилои Алиакбар Абдуллоев, мудири «Маркази инъикос ва тарғиби зидди фасод», масъалаи муроҷиати шаҳрвандон ба мақомоти давлатӣ роҷеъ ба ҳалли проблемаҳояшон ва мубориза бо коррупсия яке аз масъалаҳои муҳими ҷомеаи феълии Тоҷикистон буда, бояд дар ин самт сохторҳои марбута дар ҳамкорӣ бо ҷомеаи шаҳрвандӣ тадбирҳои мушаххас андешанд. Зеро, афзуд Алиакбар Абдуллоев, — дар аксар маврид аз сабаби паст будани сатҳи тафаккури шаҳрвандон ва огоҳӣ надоштан аз ҳуқуқҳои конститутсионии худ муроҷиати онҳо беҷавоб мемонад. Дар ин самт мебояд маърифати ҳуқуқии шаҳрвандонро баланд бардошт. Ҳамзамон Сергей Романов, мудири иттиҳодияи ҷамъиятии «Маркази мустақили ҳифзи ҳуқуқи инсон» ва Нуриддин Қаршибоев раиси АМВАОМТ ва дигар иштирокдорон доир ба асосҳои ҳуқуқии муроҷиати шаҳрвандон, шаффоф баррасӣ намудани муроҷиати шаҳрвандон аз ҷониби сохторҳои салоҳиятдор дар доираи санадҳои ҳуқуқию меъёрии ҷумҳурӣ, хусусан қонун «Дар бораи муроҷиати шаҳрвандон», роҳҳои ҷилавгирӣ аз ришваситонӣ, баланд бардоштани сатҳи маърифати ҳуқуқии шаҳрвандон ва ҳимояи ҳуқуқу озодиҳои онҳо, тақвияти ҳамкорӣ байни сохторҳои давлатӣ ва ҷомеаи шаҳрвандӣ дар ҳалли масълаи марбута табодули назар карданд.Тамоми пешниҳодоту тавсияҳои дар сӯҳбати мизи гирд ироашуда, ояндаи наздик аз ҷониби АМВАОМТ манзури ҳукумати мамлакат карда мешавад.