Ҷамъоварии пахта ба 200 ҳазор тонна наздик шуд

Душанбе, 20 сентябр. (АМИТ «Ховар», Лаззат Диловарзод).- Тибқи маълумоти Раёсати растанипарварии Вазорати кишоварзӣ, аз 19 –уми сентябри  соли 2011   суръати  пахтачинӣ  боз ҳам тезонида шуд. Чинакчиён дар як рӯз беш аз 11 ҳазор тонна ҳосил ҷамъ меоранд.Тибқи маълумот имрӯзҳо пахтакорони вилояти Хатлон дар ҷамъоварии ҳосил пешсаф буда,  то 19 – уми сентябр  аз майдони 126 ҳазору 739 гектар 127 ҳазору 137 тонна пахта ҷамъоварӣ намудаанд.Пахтакорони вилояти Суғд   дар ҷамъоварии пахта дар ҷои дуюм қарор доранд. Дар ин вилоят то 19 – уми сентябр аз масоҳати 62 ҳазору 476 гектар 23 ҳазору 649 тонна пахта ҷамъоварӣ шудааст, ки нисбати ҳамин давраи соли 2010 16 ҳазору 400 тонна зиёд аст.Дар ноҳияҳои тобеи ҷумҳурӣ маъракаи ҷамъоварии пахта хуб ба роҳ монда шудааст. Пахтакорони ин минтақаи ҷумҳурӣ аз 24 ҳазору 403 тонна пахтаи нақшавӣ 11 ҳазору 109 тонаашро ҷамъоварӣ намуданд. Бино ба маълумоти  манбаъ, имрӯзҳо дар майдони пахтазори ҷумҳурӣ беш аз 221 ҳазор нафар ҷинакчиён ба кори ҷамъоварии пахта  сафарбар шудаанд. Муҳимаш он аст, ки ҷамъоварии пахта бе иштироки донишҷӯён ва хонандагони мактабҳои  таълимоти миёнаи умумӣ сурат мегирад.