Дар Суғд парчами миллӣ барафрохта мешавад

Душанбе, 2 сентябр. (АМИТ «Ховар», Бекназари Абӯбакр). — Дар арафаи таҷлили ҷашни 20-солагии Истиқлолияти давлатии Ҷумҳурии Тоҷикистон дар вилояти Суғд парчами миллӣ бо андозаи 15 x 500 метр барафрохта мешавад. Бо мақсади омода намудани ин парчами миллӣ раиси вилояти Суғд Қоҳир Расулзода қарори махсус ба тасвиб расонид.Тибқи қарори мазкур ба Сарраёсати молияи вилоят супориш дода шуд, ки аз ҳисоби маблағҳои бақияи озоди мавҷудбудаи буҷети вилоятӣ ба ҳисоби Раёсати ҷавонон, варзиш ва сайёҳии вилоят 35 ҳазор сомонӣ ирсол намояд.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки ҳамчунин, тибқи қарори дигари раиси вилоят ба 190 нафар собиқадорони меҳнат, шахсони барӯманд, собиқадорони Қувваҳои Мусаллаҳ ва оилаҳои шаҳидоне, ки дар муҳофизати сохти конститутсионӣ ҳалок гаштаанд дар арафаи таҷлили ҷашни 20-солагии Истиқлолияти давлатӣ кӯмаки модии яквақтаина ба маблағи 300 сомонӣ расонида мешавад.