Дар Украина Шӯрои ҷамъияти тоҷикон таъсис гардид

Душанбе, 14 сентябр. (АМИТ «Ховар», Бекназари Абӯбакр). — 8 сентябри соли 2011 дар Сафорати Ҷумҳурии Тоҷикистон дар Киев ҷаласаи тадорукотии Шӯрои ҷамъияти тоҷикон, ки дар он роҳбарият ва намояндагони ҷамъиятҳои маҳаллӣ аз 13 вилояту минтақаи Украина ширкат доштанд, баргузор шуд.
Ҷаласаро Сафири Фавқулода ва Мухтори Ҷумҳурии Тоҷикистон дар Украина Шӯҳрат Султонов ифтитоҳ намуд. Тавре дипломат таъкид сохт, роҳбарони ҷамъиятҳо бояд ба масъалаҳои ҳаёт ва фаъолияти ҳамватаноне, ки дур аз Ватан қарор доранд, таваҷҷӯҳ зоҳир кунанд. «Ҳамватанони мо – аъзои ҷамъиятҳо ҳамарӯза ба дастгириву кӯмак оид ба масоили мухталиф, ҳалли проблемаҳои ҷойдошта ниёз доранд», — зикр сохт Сафир.
Бинобар ин, бо мақсади ташкили кори доимиву мунтазам бо ҳамватанон дар асоси ҳамоҳангсозӣ ва муттаҳидкунии кӯшишу талошҳои ҷамъиятҳои вилоятиву минтақавӣ Сафир Ш. Султонов таъсис додани Шӯрои ҷамъияти тоҷиконро дар Украина пешниҳод намуд. Дар натиҷаи овоздиҳӣ Шӯрои диаспораи тоҷик дар Украина дар ҳайати 11 нафар интихоб гардид. Ба ҳайси Раиси Шӯро Нурмаҳмад Собиров, ки давоми якчанд сол ҷамъияти тоҷикони шаҳри Киевро роҳбарӣ мекард, интихоб шуд. Тибқи пешниҳоди иштирокдорони ҷаласа роҳбари Ҷамъияти тоҷикони «Пайванд»-и вилояти Харков Нурулло Сайдалиев, аъзои Ҷамъияти тоҷикони Севастопол Ҷӯрақул Набиев ва аъзои диаспораи Киев Мухтор Ҳасанов ба сифати муовинони Раиси Шӯрои диаспора интихоб гардиданд