Густариши ҳамкориҳои судманди Тоҷикистону Эрон

Душанбе, 5 сентябр. (АМИТ «Ховар», Дилшодаи Хайруллоҳ).- «Дар ҳамаи саҳнаҳо бояд дар канори ҳам бошем. Дар масоили чандҷониба ҳам пружаҳои бисёр хубе тарҳрезӣ шудаанд. Интиқоли обу барқ аз Тоҷикистон ба Эрон, хатти оҳан ва интиқоли энержӣ аз Эрон ба Тоҷикистон, ки агар тавони иқтисодӣ дошта бошем, аз Тоҷикистон беҳтар кадом давлат аст, ки мо ба ӯ нафт ё газ интиқол кунем»,- гуфт дирӯз зимни нишасти матбуотӣ ба хабарнигорони ВАО Президенти ҶИЭ Маҳмуди Аҳмадинажод.Мавсуф афзуд, ки «Барои ҳамкории давлатҳои мо имкониятҳо хеле фаровонанд. Мо метавонем ниёзҳои худамонро аввал аз кишвари бародар таъмин кунем: Эрон аз Тоҷикистон, Тоҷикистон аз Эрон, баъд биравем суроғи дигарон. Барои бисёр корҳои иқтисодӣ барномарезӣ кунем ва корҳои ҷадидро шурӯъ кунем. Хушбахтона, Тоҷикистон як ҳаракати рӯ ба рушд ва пешрафти хуберо алъон барномарезӣ кардааст»,-афзуд М. Аҳмадинажод.Президенти ҷумҳурии Тоҷикистон Эмомалӣ Раҳмон дар навбати худ зикр кард, ки маҳз ба шарофати истиқлолияти давлатии Тоҷикистон ба мо муяссар шуд, ки робитаҳои анъанавии таърихиамонро бо кишварҳои ҳамзабону ҳамфарҳанг, алалхусус бо Ҷумҳурии Исломии Эрон барқарор намуда, дар ҳамаи соҳаҳои иқтисодиву иҷтимоӣ ҳамкориҳои мутақобилан судмандро ба роҳ монем.