Истиқбол аз Истиқлол дар Нижний Новгород

Душанбе, 27 сентябр. (АМИТ «Ховар», Назокат Қодирова).-23 сентябр дар Қасри Маданияти «Химик»-и шаҳри Дзержинскийи вилояти Нижегороди Федератсияи Русия бо ташаббуси раиси созмони ҷамъиятии тоҷикони вилояти Нижегород «Умед» Мутрибшо Юсуфов ва бо кўмаку дастгирии Раиси шаҳри Дзержинский Виктор Фёдорович Сопин, инчунин бо ҳамдастии Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия ҷашни бошукўҳи 20-умин солгарди Истиқлолияти мардуми куҳанбунёд, фарҳангпарвар ва бунёдкори Тоҷикистон ботантана таҷлил гардид.Дар даромадгоҳи Қасри маданият барои ошноии бештари меҳмонон бо фарҳангу суннатҳои миллии тоҷикӣ дар як гўша намоишгоҳи намунаҳои ҳунарҳои мардумӣ ташкил ва либосҳои миллӣ, сўзанӣ, кандакорӣ, қошуқтарошӣ рўзномаву маҷалла ва китобҳои классикони тоҷик бо забони русию тоҷикӣ ба маърази тамошо гузошта шуда буд. Дар ҷашнвораи Истиқлол роҳбари Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия Асрор Одинаев ва мушовири Сафорати Ҷумҳурии Тоҷикистон дар Федератсияи Русия Сўҳроб Раҷабов ширкат варзиданд. Раиси шаҳри Дзержинский Виктор Фёдорович Сопин ва Раиси Думаи шаҳрӣ Валерий Анатолевич Чумазин тоҷикистониёнро бо рўзи иди Истиқлол муборакбод намуданд. Роҳбари Намояндагии Хадамоти муҳоҷирати назди Ҳукумати ҶТ дар Федератсияи Русия Асрор Одинаев ҳамватанони бурунмарзӣ ва муҳоҷирони меҳнатиро бо ҷашни Истиқлол табрик гуфта, аз дастоварду комёбиҳои ҷумҳурӣ тайи солҳои соҳибистиқлолӣ бо роҳбарии Президенти кишвар Эмомалӣ Раҳмон, аз ҷумла перомуни ба расмият шинохта шудани Тоҷикистон аз ҷониби кишварҳои мухталифи дуньё, буньёдкориву созандагиҳо ва иқдому ташаббусҳои гуногуни Сарвари давлат ҳарф зада, дар хотимаи сухан ба Раиси шаҳри Дзержинский Виктор Фёдорович ҷома ва тоқии миллии тоҷикӣ пўшонид. Ҳамчунин раиси созмони ҷамъиятии тоҷикони вилояти Нижегородский Мутрибшо Мирзоев, имомхатиби масҷиди шаҳри Дзержинский Ҳайдар-ҳазрат Раҳматулин, намояндаи диаспораи арманиҳо Артак Сандроевич, ноиби президенти минтақавии созмони миллию фарҳангии вилоятии озариҳо Фотима Магомедовна ва дигарон сухан гуфтанд. Хотири ҳозирон ва табъи ҳамватанонро соҳиби лауреати байналхалқиву умумирусиягӣ ва ғолиби озмуни минтақавии эстрадии кўдакони шаҳри Дзержинский Фотима Ҷонбобоева бо суруди «Душанбе, мой Душанбе», Музаффар Абдувоҳидов бо навои дутор, ансамбли рақсии тоҷикӣ «Ҷавонӣ», сарояндаи мардумӣ Бобоҷон Холов бо суруди «Модар» шод гардониданд. Дар хотима филми таърихӣ ва бадеии «Рустам ва Сўҳроб» аз рӯи асари «Шоҳнома»-и безаволи Ҳаким Фирдавсӣ нишон дода шуд. Дар ин бора аз маркази матбуоти намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия хабар доданд.