Мактабе, ки назираш дар Фархор нест

Душанбе, 6 сентябр.(АМИТ «Ховар», Марзия Саидова).-Дар остонаи таҷлили 20-умин солгарди Истиқлолияти давлатии Ҷумҳурии Тоҷикистон 6 сентябр дар ноҳияи Фархори вилояти Хатлон мактаби нави таҳсилоти умумии рақами 38, ки дар ҷамоати деҳоти Ғайрат деҳаи Тоҷикистон воқеъ гардидааст, сохта ба истифода дода шуд. Дар маросими ботантана ба истифода додани мактаби наву замонавӣ вазири маорифи ҷумҳурӣ Абдуҷаббор Раҳмонов, кормандони масъули Дастгоҳи Президенти ҷумҳурӣ ва намояндагони мақомоти иҷроияи ҳокимияти давлатии вилояти Хатлон ва ноҳияи Фархор иштирок намуданд. Онҳо толибилмонро бо оғози соли нави таҳсил дар мактаби нав табрик гуфта, ба толибилмон таҳсили аъло ва интизоми намунавӣ таманно карданд.Назар ба иттилои Ғазалшо Сафаров, мудири шӯъбаи маорифи ноҳияи Фархор, мактаби замонавии рақами 38, ки қаблан дар ҳолати садамавӣ қарор дошт, аз ҷониби соҳибкор Қурбон Назаров, ки дастпарвари ҳамин мактаб аст ба маблағи 168 ҳазор доллар сохта шуд. Мактаб, ки бо усули меъмории муосир бунёд гардидааст аз як ошёна иборат буда, дорои 522 ҷои нишаст, 19 синфхонаи фаннӣ, 6 ҳуҷраи корӣ барои омӯзгорн мебошад. Макабро сохтмончиёни ширкати сохтмонии маҳаллӣ дар зарфи 2, 5 моҳ сохта ба истифода додаанд. Мактаб дар масоҳати 1, 5 гектар доман густурда, дорои толори хониш, бойгонӣ, китобхона ва синфхонаи компютерӣ мебошад.