Раддияи сарраёсати қушӯнҳои сарҳадии КДАМ ҶТ

Душанбе, 1 сентябр. (АМИТ «Ховар», Мавҷуда Анварӣ). — Рӯзҳои охир дар саҳифаҳои интернет бо номи «Қӯшунҳои сарҳадии тоҷик сагҳои амрикоиро куҷо карданд?» («Что таджикские погранвойска сделали с американсками собаками?») мақолаи тӯҳматангез ва иғвогарона нисбат ба сарҳадбонони қӯшунҳои сарҳадӣ дарҷ гардид. Ҳамчунин дар рӯзномаи «ИмрӯзNews» мақолаи «Сарҳадбонони сагхӯри тоҷик» чоп шуд, ки дар он сарҳадбонони тоҷик зери маломати беасос мондаанд.Нисбат ба ин маркази матбуоти қӯшунҳои сарҳадии Кумитаи давлатии амнияти миллии ҶТ ба АМИТ «Ховар» изҳор менамояд, ки ҳамаи далелҳои дар мақола овардашуда дурӯғи маҳз мебошанд, чунки курси тайёрии сарбози ҷавон на 40 рӯз, балки 3 моҳро ташкил намуда, пас аз ин омодагии махсуси сарбозон аз рӯи ихтисосҳои ронанда, алоқачӣ, ошпаз ва ғайра оғоз мегардад, ки дар он сарбозон боз се моҳи дигар (ҳамагӣ шаш моҳ) дарс меомӯзанд.Ғайр аз ин, Бюрои оид ба муборизаи зидди маводи нашъаовар ва ҳифзи тартиботи Департаменти давлатии ИМА ба сарҳадбонони тоҷик умуман ягон саг надодааст. Сарҳадбонони тоҷик дар ин дидбонгоҳҳо сагҳои хизматиро нафурӯхтаанд, чунки онҳо дар дидбонгоҳҳои сарҳадии Боғ ва Баҳорак саг надоштанд. Нисбат ба ҳолати дидбонгоҳҳои сарҳадии Боғ ва Баҳорак манбаъ изҳор менамояд, ки соли 2007 бо кӯмаки Сафорати ИМА дар Тоҷикистон дидбонгоҳи Боғ ба маблағи 244 ҳазору 539 доллар, дидбонгоҳи Баҳорак ба маблағи 224 ҳазор доллар, ҳамагӣ ба маблағи 468 ҳазору 539 доллари ИМА аз таъмири асосӣ бароварда шудаанд. Ин дидбонгоҳҳо аз беҳтаринҳо маҳсуб ёфта, хобгоҳи сарбозон ошхона ва ҳаммом доранд. Ммрикоиҳо мутобиқи барнома дидбонгоҳҳоро бо таҷҳизот, аз ҷумла бо кату бистарҳои хоб таъмин намудаанд. Ба рӯзноманигорони тоҷик, ки ин гуна мақолаҳоро ба тарзи кофӣ насанҷида, дар матбуоти даврӣ воҳима андохта чоп менамоянд, изҳор медорем, ки пеш аз ҳама бояд ватандӯст бошанд, сарҳадбонони тоҷикро, ки шабу рӯз дар ҳимояи марзи Ватан мебошанд, санги маломат назананд. Роҳбарияти қӯшунҳои сарҳадӣ омода аст намояндагони «ИмрӯзNews»-ро ба дидбонгоҳҳои номбурда роҳбаладӣ намояд, то ин ки онҳо бо шароити зисту зиндагии сарҳадбонон бевосита шинос шаванд.