Рушди инфрасохтори гумрукию сарҳадӣ
Душанбе, 15 сентябр. (АМИТ «Ховар», Лутфия Эшонкулова).- Тавре ба мухбири АМИТ «Ховар» аз Хадамоти гумруки назди Ҳукумати Ҷумҳурии Тоҷикистон хабар доданд, Ҳукумати Ҷумҳурии Тоҷикистон ба рушди инфрасохтори гумрукию сарҳадӣ, аз ҷумла ба ободонии гузаргоҳҳои сарҳадӣ аҳамияти муҳим медиҳад. Чунинчи, тайи солҳои 2006-2010 аз ҳисоби маблағҳои махсуси Хадамот ва бо ҷалби кӯмакҳои хориҷӣ сохтмони дидбонгоҳҳои гумрукии «Айвоҷ», «Патар», «Қӯштегирмон», «Маданият», «Гулистон», «Панҷи поён», «Терминал»- и шаҳри Қӯрғонтеппа, «Терминал»-и ноҳияи Мурғоб ва таъмири 8 гумруку дидбонгоҳи гумрукии «Душанбе-1», «Ишкошим», «Кокул», инчунин бинои Донишкадаи такмили ихтисоси кормандони мақомоти гумрук мавриди истифода қарор гирифт.Чанде пеш сохтмони дидбонгоҳи гумрукии «Ҷиргатол», ки дар доираи Лоиҳаи замонависозии гумрук ва рушди инфрасохтор, ки тибқи созишномаи қарзии миёни Ҳукумати Ҷумҳурии Тоҷикистон ва Бонки Осиёии Рушд амалӣ шуда истодааст, ба анҷом расид. Дидбонгоҳи мазкур бо воситаҳои техникии муосир, аз ҷумла бо таҷҳизоти махсуси назорати гумрукии «Рапискан» пурра таъмин гардида, ба системаи ягонаи иттилоотӣ пайваст шудааст.