Соҳаи занбӯрпарварӣ инкишоф меёбад

Файзобод, 20 сентябр. (АМИТ «Ховар», Зебо Давлатова). – Занбӯрпарварӣ соҳаи камхароҷот ва сердаромад ба ҳисоб рафта, асоси кори онро парваришу нигоҳдорӣ ва истифодаи занбӯри асал барои гардолудсозии набототи энтомофилӣ ва боло бурдани ҳосилнокии соҳа ташкил медиҳад. Бахусус тибқи муқаррароти Қонуни Ҷумҳурии Тоҷикистон «Дар бораи занбӯрпарварӣ» ҳамаи хоҳишмандон, шахсони воқеию ҳуқуқӣ, ҳамчунин ташкилоту корхонаҳо имкон доранд, ки ба парвариши занбӯри асал машғул шаванд. Беҳтарин асалпарварони ноҳияи Файзобод ба он мекӯшанд, ки баробари ба мардум асали тозаю хуштаъм пешкаш намудан дигар намудҳои маҳсулоти занбӯри асал — мум, шири занбӯр, заҳри занбӯр, ширеш, гарди гулро низ ба роҳ монанд. — Айни замон дар ноҳия 5 ҳазору 508 оилаи занбӯри асал парвариш меёбад ва ҳамасола то 700 – 800 оилаи занбӯрро зиёд менамоем, иброз намуд ҳангоми сӯҳбат сарвари раёсати кишоварзии ноҳия Ҳукматулло Қодиров. Ӯ афзуд, ки соли ҷорӣ истеҳсоли асал дар ноҳия тибқи барномаи мазкур ба 53 тонна хоҳад расид ва он бозгӯйи инкишофи соҳа дар ноҳия мебошад.