Созишномаҳои нави Тоҷикистону Русия

Душанбе, 2 сентябр. (АМИТ «Ховар», Дилшодаи Хайрулло). — Нимаи дуюми  рӯзи 2 сентябр барномаи боздиди расмии Президенти Федератсияи Русия Дмитрий Медведев ба Тоҷикистон  дар Қасри Миллат бо маросими истиқболи расмӣ оғоз ёфт.Масоили ҳамкории бисёрҷанбаи Тоҷикистону Русия нахуст дар мулоқоти хоссаи сарони ду давлат бо иштироки ҳайатҳои ду ҷониб баррасӣ шуд. Таъкид гардид, ки Тоҷикистон ҳамчунин бо минтақаҳои гуногуни Русия беш аз 75 созишномаи муҳими ҳамкорӣ ба имзо расонидааст.   Баъди анҷоми мулоқоту музокирот бо иштирок ва дар ҳузури сарони ду давлат чанд санади нави ҳамкорӣ ба имзо расид:Протоколҳо доир ба ҳамкории сарҳадӣ миёни Кумитаи давлатии амнияти миллии Ҷумҳурии Тоҷикистон ва Хадамоти федералии амнияти Федератсияи Русия;Барномаи ҳамкории иқтисодӣ миёни Ҳукумати Ҷумҳурии Тоҷикистон ва Ҳукумати Федератсияи Русия барои солҳои 2011-2014;Сарони ду давлат Эмомалӣ Раҳмон ва Дмитрий Медведев ба Созишнома миёни Ҷумҳурии Тоҷикистон  ва Федератсияи Русия оид ба ҳамкории сарҳадӣ ва Баёнияи муштараки Президенти Ҷумҳурии Тоҷикистон ва Президенти Федератсияи Русия имзо гузоштанд.Зимни нишасти матбуотӣ сарони ду давлат аз натиҷаи мулоқоту музокироти расмӣ изҳори қаноатмандӣ карда, дурнамои ҳамкории гуногунҷанбаи Тоҷикистону Русияро дорои дурнамои пурмӯҳтаво арзёбӣ намуданд.«Имрӯз робитаҳои Тоҷикистону Русия, ки ба принсипҳои шарикии стратегӣ асос ёфтаанд, тамоми соҳаҳои калидӣ, аз ҷумла сиёсат, иқтисод, сармоягузорӣ, савдо, ҳарбӣ ва ҳарбию техникӣ, гуманитарӣ ва ғайраро фаро мегиранд», — изҳор дошт дар оғози сӯҳбат Сарвари давлати Тоҷикистон Эмомалӣ Раҳмон. Дмитрий Медведев дар навбати худ мулоқоти пайвастаи сатҳи олии сиёсии ду кишварро омили рушди муносиботи дуҷониба номида, аз 12% дар соли 2010 афзудани ҳаҷми мубодилоти молу маҳсулот изҳори қаноатмандӣ намуд. Бо қаноатмандӣ ҳамчунин таъкид гардид, ки ин тамоюли нек имсол низ идома дорад.