Вохӯрии Қ. Қосимов бо О. Гаврук

Душанбе, 29 сентябр. (АМИТ «Ховар», Дилшодаи Хайруллоҳ).- 29 сентябр дар Вазорати кишоварзии Ҷумҳурии Тоҷикистон вохӯрии вазири кишоварзии Тоҷикистон Қосим Қосимов бо Сафири Ҷумҳурии Беларус дар Ҷумҳурии Тоҷикистон хонум Гаврук Олга доир гардид. Мақсади асосии вохӯрӣ аз боздиди эҳтиром ва густариш додани ҳамкориҳои дуҷониба дар соҳаи кишоварзӣ иборат буд. Дар оғози вохӯрӣ вазири кишоварзӣ Қ. Қосимов ҳамкориҳои дуҷонибаро бо мамлакати Беларус дар рушди соҳаи кишоварзӣ мусбат арзёбӣ намуд. Ёдовар мешавем, ки мамлакати моро бо Беларус робитаҳои дӯстона ва ҳамкориҳои дуҷонибаи тиҷоратию иқтисодӣ мепайванданд. Аз ҷумла, аз моҳи январ то моҳи августи соли 2011 мубодилаи молу маҳсулот 49,2 млн. долларро ташкил менамояд, ки нисбат ба ҳамин давраи соли сипаригардида 57,7% зиёд гардидааст. Аз Ҷумҳурии Тоҷикистон ба Ҷумҳурии Беларус асосан нахи пахта, алюминий ва меваи хушк содир шудааст. Аз Беларус бошад ба мамлакати мо ғалла, қанд, резина ва каучук, метали сиёҳ, мебел, чӯб ва масолеҳи чӯбин, нақлиёт ва маҳсулоти ғайриорганикӣ ворид гардидааст. Байни вазорати кишоварзии ҶТ ва вазорати кишоварзии Беларус соли 2006 Созишномаи ҳамкорӣ дар соҳаи комплекси агросаноатӣ ба имзо расида буд. Ҳамзамон ҳамкориҳо дар соҳаи чорводорӣ низ идома доранд, ки дар давраи соли 2010 ба ҷумҳуриамон 212 сар чорвои калони шохдори зотӣ ворид гардидааст. Дар раванди вохӯрӣ тарафҳо ба фаъолияти имрӯза ва ояндаи бахшҳои растнипарварӣ, чорводорӣ, ташкил намудани маркази хизматрасониҳои техникаҳои кишоварзии истеҳсоли Беларус дар Ҷумҳурии Тоҷикистон, таҳияи лоиҳаҳои инвеститсионии муштарак дар соҳаи кишоварзӣ барои ҷалби сармояи Беларус бо мақсади баланд бардоштани сатҳи дониши кадрҳо таваҷҷӯҳи асосӣ зоҳир намуда, таклифу дархост пешниҳод намуданд.