ҶДММ «АЛМ» «Ришта»-ро месозад

Душанбе, 5 октябр. (АМИТ «Ховар», Дилшодаи Хайрулло). – Бо мақсади расидан ба ҳадафҳои «Барномаи коркарди пурраи нахи пахтаи дар Ҷумҳурии Тоҷикистон истеҳсолшаванда дар давраи то соли 2015» дар ноҳияи Ҳисор аз ҷониби Ҷамъияти дорои масъулияти маҳдуди «АЛМ» сохтмони корхонаи коркарди пурраи нахи пахта дар заминаи корхонаи «Ришта»-и Ҳисор, ки солҳои охир аз фаъолият бозмонда буд, аз 1 ноябри соли 2010 ба кор оғоз намуд.То имрӯз 75 контейнер таҷҳизоти технологӣ ба корхона ворид шудааст. Маблағ барои харидорӣ намудани таҷҳизот аз Ширкати «Ҷийеме Филатии» 6 млн 500 ҳазор доллари амрикоиро ташкил медиҳад. Мутахассисони итолёвӣ ва мутахассисони худи корхона дастгоҳу таҷҳизоти воридшударо аз сехи тайёркунӣ то маҳсулоти тайёри ришта васл кардаанд, ки омодаи кор мебошанд.Навбати аввали истеҳсоли корхонаи ресандагии ҶДММ «АЛМ» (Файзи Истиқлол) бо иқтидори коркарди 4000 тонна нахи пахта дар як сол 4 октябри соли 2011 бо иштироки Президенти кишвар Эмомалӣ Раҳмон ба кор оғоз намуд.Ҳоло дар корхона 208 нафар коргар кор мекунад.