Чорабинии Хадамоти муҳоҷират дар саристгоҳи Қазони Маскав

Душанбе, 6 октябр. (АМИТ «Ховар», Марҳабо Зунунова). – Чанде пеш кормандони Намояндагии Хадамоти муҳоҷирати Тоҷикистон дар Федератсияи Русия дар саристгоҳи Қазон сафари хизматӣ анҷом доданд.Якҷоя бо намояндагони Сафорати Ҷумҳурии Тоҷикистон дар Федератсияи Русия ва намояндаи роҳи оҳани Тоҷикистон вазъи аз назорати бехатарӣ гузаштани шаҳрвандони ҷумҳуриамон дар қатораи мусофирбаре, ки ба самти Кӯлоб ҳаракат мекард, тафтиш карда шуд. Маълум гардид, ки қаблан, дар охири моҳи сентябр, бар асари номуташаккилӣ ва беинтизомии гурӯҳи мусофирон дар ин ҷо ҳодисаҳои якдигарро тела додани одамон ва бидуни навбат ба вагонҳои қатора дохил шудани онҳо рух додааст. Кормандони мақомоти ҳифзи ҳуқуқ маҷбур буданд, ки ҷиҳати барқарор намудани оромию бехатарии саристгоҳ чораҳои зарурӣ бинанд. Мутаассифона, чунин ҳодисаҳо боиси бесару сомонӣ дар саристгоҳи қатораҳо мегардад. Бо дарназардошти ин ҷониби Тоҷикистон бо шаҳрвандон сӯҳбатҳои дахлдор анҷом дод. Дар ин бора ба АМИТ «Ховар» дар дафтари матбуоти Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия иттилоъ доданд.