Муҳокимаи лоиҳаи қонун бо ҳузури масъулин

Душанбе, 21 октябр.(АМИТ «Ховар», Марзия Саидова).-       «Сиёсати Буҷети  давлатии Ҷумҳурии Тоҷикистон барои соли 2012  бо мақсади дар амал татбиқ намудани сиёсати Президенти кишвар ва Ҳукумати ҷумҳурӣ равона гардида, дар он афзалиятҳои муҳими давлатӣ- ба даст овардани истиқлолияти энергетикӣ, таъмини ҳифзи иҷтимоии аҳолӣ ва бехатарии озуқаворӣ, раҳоии кишвар аз бунбасти коммуникатсионӣ ба инобат гирифта шудаанд». Ин матлаб зимни баррасии лоиҳаи Қонуни Ҷумҳурии Тоҷикистон «Дар бораи буҷаи давлатии Ҷумҳурии Тоҷикистон барои соли 2012», ки 21 октябр дар ҷаласаҳои Кумитаҳои палатаи поёнии парлумони мамлакат муҳокима шуд, зикр гардид.Аз Маҷлиси намояндагон ба АМИТ «Ховар» иттилоъ доданд, ки дар ҷараёни муҳокимаи буҷети давлатӣ барои соли 2012  мушовири калони Президенти мамлакат Хурсандмурод Мирзоев, вазири молия, раиси Кумитаи андози назди Ҳукумати ҷумҳурӣ, сардори хадамоти гумруки назди ҳукумати мамлакат ва дигар намояндагону масъулини вазорату идораҳои дахлдор иштирок доштанд.Бояд зикр кард, ки дар лоиҳаи буҷаи давлатии ҷумҳурӣ барои соли 2012 тамоми манбаъҳои маблағгузорӣ, аз қабили даромадҳои ҷорӣ, грантҳо, қарзҳо барои амалӣ намудани лоиҳаҳои сармоягузорӣ ва қарзҳои дигари давлатӣ, инчунин маблағҳои махсуси ташкилоти буҷавӣ  ҷамъ оварда шудаанд.Тазаккур дода шуд, ки буҷаи давлатии соли 2012 пеш аз ҳама барои рушди иқтисодиёти кишвар, баланд бардоштани сатҳи некӯаҳволии мардум, таъмини амнияти озуқаворӣ, беҳбуди хизматрасонии иҷтимоии давлатӣ, рушди иқтисодиёт, нақлиёт, энергетика, кишоварзӣ ва ислоҳоти маблағгузории соҳаҳои маориф, тандурустӣ, мақомоти идораи давлатӣ ва дигар бахшҳо равона карда мешавад.Дар фарҷом лоиҳаи қонун ҷиҳати баррасӣ ба Шӯрои Маҷлиси намояндагон пешниҳод гардид.