Намоиш ва фурӯши маҳсулоти кишоварзӣ дар шаҳрҳои саноатии вилояти Суғд

Душанбе, 24 октябр. (АМИТ «Ховар», Покиза Маҳмадбекова). — Дар майдони «Ситораҳои Хуҷанд», воқеъ дар маҳаллаҳои 12-ум ва 20-уми  шаҳри  Хуҷанд,  ҳамчунин дар шаҳрҳои  саноатии Чкалов, Табошар ва Қайроққум 22 – октябри соли равон аз тарафи кишоварзони шаҳру ноҳияҳои вилоят намоиш ва фурӯши  маҳсулоти кишоварзӣ баргузор гардид.   Ба мухбири АМИТ «Ховар» аз Хадамоти матбуотии раиси вилояти Суғд иттилоъ доданд, ки  дар он  фурӯши маҳсулоти мавриди  ниёзи мардум, аз қабили гӯшт, биринҷ, орд, равған, асал, шакар, мош, лӯбиё, тухм, мева, сабзавот роҳандозӣ гардид.Маҳсулоти кишоварзие, ки ба фурӯш бароварда шуд,   дар маҷмӯъ 326,49 тоннаро ташкил дода, нисбат ба нархи миёнаи бозорҳои шаҳри Хуҷанд 20-30 фоиз арзонтар  ба мардум фурӯхта шуд.   Бояд қайд намуд, ки дар ярмарка КВД «Захираҳои моддии вилояти Суғд» 7 тонна орд, шакар, биринҷ ва Иттифоқи матлуботи шаҳру ноҳияҳои вилоят зиёда аз 30 тонна маҳсулоти ниёзи мардумро ба фурӯш баровард.