Нигаронии терминалҳо

Душанбе, 31 октябр. (АМИТ «Ховар», Лаззат Диловарзод).- Дар маҷлиси Шӯрои директорони ассотсиатсияҳои нақлиёти автомобилии мусофирбар (НАМ)- и вилояти Суғд роҳбарони терминалҳо аз Корхонаи воҳиди давлати (КВД)-и  «Маркази сертификатсиякунонӣ» изҳори нигаронӣ намуданд. Ба гуфти роҳбарони терминалҳо,  КВД «Маркази сертификатсиякунонӣ» бе базаи истеҳсолӣ ва бе таҷҳизоти зарурӣ фаъолият намуда, сертификатсиякунониро  бе гузаронидани санҷишҳои зарурӣ анҷом медиҳад, ҳол он ки бо қарори Ҳукумати ҷумҳурӣ аз 4 – уми марти соли 2002 гузаронидани сертификатсиякунонии сифати техникии  воситаҳои нақлиёт ба зиммаи базаҳои технологӣ вогузор шудааст.Ба гуфти сарвари филиали Ассотсиатсияи нақлиёти автомобилии мусофирбари ҷумҳурӣ дар вилояти Суғд Н. Шарипов КВД «Маркази сертификатсиякунонӣ» баъди таъсис ёфтанаш (1. 03. 2011) сертификатсиякунониро ба зиммаи худ гирифта, базаҳои технологиро аз он озод намуд, ки дар натиҷа нархи хизматрасонӣ се маротиба боло рафт.