Нозирони тоҷик ба Бишкек рафтанд

Душанбе, 28 октябр.(АМИТ «Ховар», Марзия Саидова).- Намояндагони Ҷумҳурии Тоҷикистон ҷиҳати мушоҳида аз ҷараёни баргузории интихоботи президентӣ дар Ҷумҳурии Қирғизистон ба Бишкек сафар карданд. Назар ба иттилои Абдуманнон Додоев, роҳбари Дастгоҳи Комиссияи марказии интихобот ва раъйпурсии Ҷумҳурии Тоҷикистон, ҳайати Тоҷикистон, ки аъзои он ба ҳайси нозирони байналмилалӣ ҷараёни интихоботро мушоҳида менамоянд,  аз узви Маҷлиси миллӣ Ҷамила Кенҷекулова, вакили Маҷлиси намояндагон Олим Сафаров ва сармутахассиси Комиссияи марказии интихобот ва раъйпурсии Ҷумҳурии Тоҷикистон Насимҷон Мирзомуродов иборат аст.Бояд зикр кард, ки дар интихоботи президенти Қирғизистон, ки 30 октябри  соли 2011 баргузор мегардад, 19 нафар барои соҳиб шудан ба курсии Президенти Қирғизистон бо ҳам рақобат менамоянд.  Комиссияи интихоботии Қирғизистон беш аз се миллион нафар раъйдиҳандагонро ба қайд гирифта, ба онҳо варақаҳои овоздиҳиро пешниҳод намудааст.