«Саразм» минтақабоб гардид

Душанбе, 10 октябр. (АМИТ «Ховар», Лаззат Диловарзод).-Шолии навъи «Саразм» дар ҷумҳурӣ минтақабоб гардид. Офарандагони ин навъи шолӣ олимони маркази  таҷрибавии Панҷакент   мебошанд, ки  ба гирифтани 1 патент ва 3 шаҳодатномаи муаллифӣ  ноил гардидаанд,- гуфт котиби Академияи илмҳои кишоварзӣ Давлатҷон Комилзода ба мухбири АМИТ «Ховар».Ба иттилои манбаъ, танҳо дар натиҷаи тадқиқот ва тадбирҳои чандинсолаи  олимон имконияти  пайдо намудани шолии серҳосил ва тезпазак пайдо гардид, ки ба он аз рӯи минтақаи парваришёфтааш  номи «Саразм» дода шуд. Ба гуфти Д. Комилзода, дар як хӯшаи шолии «Саразм» беш аз 100 дона биринҷ мавҷуд аст, ки ин нодиртарин  комёбии илмӣ  дар  соҳаи шолипарварӣ мебошад. Соли оянда ин навъ дар саросари  хоҷагиҳои шолипарвари ҷумҳурӣ парвариш хоҳад шуд.