ЗИНДАВУ ҶОВИД МОНД…

Душанбе, 5 октябр.(АМИТ «Ховар», Лаззат Диловарзод).-Хабари тозае, ки тавассути муассисаи нашриявии «Адиб»-и Вазорати фарҳанги Ҷумҳурии Тоҷикистон дастраси хонандагон гардид, чопи маҷмўаи очерку мақолаҳои рўзноманигор, собиқ сармуҳаррири бахши хориҷӣ радиои Тоҷикистон Раҷабалӣ Қудратов зери унвони «Назми ҷаҳонтоб» аст, ки ёд аз ҷашнвораҳои Шоири халқии Тоҷикистон, Қаҳрамони Тоҷикистон, Қаҳрамони Меҳнати Сотсиалистӣ устод Мирзо Турсунзода мекунад. Маҷмӯа бо теъдоди 1000 нусха нашр шудааст. Маводи дар ин маҷмўа ҷамъовардаро то дараҷае метавон зиндагиномаи Қаҳрамони Тоҷикистон– устод Мирзо Турсунзода номид. Муаллиф то андозае кўшидааст, ки дар маҷмўа аз назараш ягон саҳифаи роҳи ҳаёти пурбаракату маҳсули эҷоди шоир дур намонад. Муаллиф дар баъзе лаҳзаҳо бо овардани сухани ҳакимона хонандаро водор месозад, ки амиқтар андеша кунад, то қадру манзалати саромадони миллати хешро фаротар бишносад ва ба истедоди баланди онҳо, ки каломашон реша ба умқи назми ҳазорсолаи халқи худ дошта, дар тарбияи наслҳо заминаро гузоштаанд, ҳифз намояд. Дар маҷмўа давраи бачагӣ, мактабхонӣ, таҳсил дар дорулмуаллимин ва қадамҳои устувори дар кори эҷодӣ гузоштаи шоир, ки бо маншаъ аз шарари ғазалиёти Ҳофиз дар мазраи дили пурэҳсоси ў сухани нобу шеворо фурӯ рехта буданд, хуб ба қалам дода шудааст. Муаллиф аз мактаби бузурги адабиёти классикии тоҷику форс сабақ омӯхтани шоирро чун шадда ба риштаи сухан кашида, дар дили ӯ шавқу шарар ангехтани ғазалҳои шӯрангези Ҳофизу Саъдӣ, Низомию Ҷомиро, ки сеҳри суханро барояш додаанд, хеле ҷолиб пешниҳоди хонанда гардонидааст. Раҷабалӣ Қудратов дар ин маҷмўа ёддошти мухтасари баргузории ҷашнҳои солгарди устод Мирзо Турсунзодаро аз 50 то 90 солагӣ дар шакли гузоришҳои ҷолиб пешниҳоди хонандагон намудааст. Хонандаи закӣ ва борикбин тавассути ин маҷмўи аз он воқиф мегардад, ки бо дархости аҳли ҷомеа ва бо ибтикори Ҳукумати вақти Тоҷикистон унвони ифтихории «Шоири халқии Тоҷикистон» муқаррар гардида, тибқи фармони Раиси Президиуми Шӯрои Олии Тоҷикистон дар ҷашни 50-солагии зодрўз ва 30- солагии фаъолияти эҷодӣ нахустин унвони ифтихорӣ ба адиби маъруф, ходими ҷамъиятию давлатӣ, раиси Кумитаи сулҳи Осиёю Африқо Мирзо Турсунзода дода шудааст. Ба муаллифи маҷмўа муяссар шудааст, ки шахсиятҳоеро, ки бузургии Турсунзодаро аз як ҷашнвора то ҷашнвораи дигар бузургтар, равонию салосати шеърашро тароват ва рангу бўи нав додаанд, пайдо кунад, ки яке перомуни шеъри ноби шоир ҳарфе сутуда бошад, дигаре аз муборизаҳои шоир баҳри саодати инсоният ва саввумӣ аз хислатҳои баргузидаи шоир омиронаю олимона суханронӣ кардаанд. Як нукта боиси таъкид аст, ки ҷашни 60 солагӣ охирин дидорбинӣ бо саромадони адабиёти олам барои шоири зиндаёд Мирзо Турсунзода буд, ки онро дар дили оташбор ва сулҳофараш бо худ бурд. Ин бузургиро муаллиф аз забони шоири рус Николай Тихонов дар маҷмўаи очерку мақолоти худ, ки дар ҷашни 60-солагии адиби нуктапардоз аз минбари ҷашнвора садо додааст, овардааст: «Силсилакӯҳҳои Ҳисору Помир бо он ҳама бузургиву баландӣ аз Мисру Порис ва дигар мамолики ҷаҳон ба назар наметобанд, аммо ном ва назми Турсунзода чун қуллаи тобон аз ҳар гўшаи ҷаҳон намоёнанд». Ҳар қадар ки ҷашнвораҳои шоир боло мерафт, ҳамон қадар шўҳрату шаҳомати шоир миёни мардум боло мегирифт. Хонанда худ метавонад бо мутолиаи маҷмўа аз ҳақиқати таърих ва сиёсати хирадмандонаи Президенти Ҷумҳурии Тоҷикистон ва мусоидати ў дар парвозҳои баланд ҳамбол ва ҳамнафас будани Мирзо Турсунзодаро бо истиқлолияти Тоҷикистон хулосабарорӣ кунад. Ҳақ ба ҷониби Сарвари давлат аст, ки гуфтааст: «Меҳри Мирзо Турсунзода дар ошёни баландтарин – дили халқ маъво гирифтааст ва халқ хотираи неку дурахшони фарзанди маҳбуби хешро то абад ҳифз хоҳад кард». Месазад, ки дар ҳошияи гуфтаҳои Сарвари давлат байтеро аз пайғамбари ғазал – ҳазрати Саъдӣ ёдрас шавем, ки гуфтааст: Зиндаву ҷовид монд, ҳар кӣ накӯном зист, К-аз ақибаш зикри хайр зинда кунад номро.