Э. Раҳмон: «Олимони мо бояд парчамбардори миллат бошанд»

Ноябрь 18, 2011 17:25

Душанбе, 18 ноябр. (АМИТ «Ховар», Дилшодаи Хайруллоҳ). — Имрӯз дар бинои Театри давлатии академии опера ва балети ба номи С.Айнӣ маҷлиси тантанавӣ бахшида ба таҷлили 60-солагии таъсисёбии Академияи илмҳои Ҷумҳурии Тоҷикистон бо иштироки Президенти мамлакат Эмомалӣ Раҳмон баргузор гардид.Сарвари давлат зимни суханронии худ ҳамаи донишмандон ва кормандони илмии Академияи илмҳо ва тамоми аҳли илми Тоҷикистонро ба ин муносибат самимона табрик гуфт.Ӯ афзуд, ки «Давлат ва ҳукумат илмро ҳамчун омили пешбарандаи ҷамъият арзёбӣ намуда, барои рушди минбаъдаи он ва беҳтар кардани шароити иҷтимоиву иқтисодии олимон тадбирҳои судманд меандешад». Академияи илмҳои мустақили Тоҷикистон ҳамчун маркази пешбурди таҳқиқоти илмӣ соли 1951 таъсис шудааст. Аввалин Президенти Академияи илмҳои Тоҷикистон нависанда ва арбоби барҷастаи илму фарҳанг устод Садриддин Айнӣ интихоб гардида буд, ки барои хизматҳои шоён дар назди халқу Ватан дар даврони истиқлолият нахустин шуда ба ӯ унвони Қаҳрамони Тоҷикистон дода шуд.Таъкид шуд, ки беш аз 300 навоварӣ ва тавсияҳои илмии олимони Академияи илмҳо барои татбиқ дар истеҳсолот пешниҳод гардидаанд ва ҳоло аксари онҳо дар муҳимтарин соҳаҳои иқтисодиёт, аз ҷумла кишоварзӣ, сохтмон, металлургия, саноати химия, техникаи ҳисоббарор, геология ва тиб амалӣ мешаванд. Зикр шуд, ки ҳамчунин бояд ба тайёр кардани олимон ва мутахассисон дар соҳаҳои муосири илмҳои дақиқ, табиатшиносӣ ва техникӣ, аз ҷумла дар соҳаву бахшҳои зилзилашиносӣ, геоэкология, технологияи иттилоотӣ, биотехнология, генетика, энергетика ва иқлимшиносӣ таваҷҷўҳи махсус равона шавад. Президенти кишвар изҳори боварӣ намуд, ки нерўи зеҳнии халқи тоҷик имкон медиҳад, то олимони мо ин анъанаи некро идома дода, дар самтҳои гуногуни илм минбаъд ҳам парчамбардор бошанд.Президенти кишвар таъкид намуд, ки илми тоҷик дар марҳилаи кунунии пешрафт бо дастовардҳои тоза ба тоза ҷиҳати таҳкими созандагиву буёдкорӣ ва таҳкими истиқлоли миллӣ нақши муассир бояд бозад. Сарвари давлат Эмомалӣ Раҳмон ҳамчунин мужда расонид, ки ҳаҷми унвонпулии узви пайваста (академик) ва узви вобастаи Академияи илмҳо, ки бо амри Президенти Ҷумҳурии Тоҷикистон аз 1 – уми январи соли 2002 мутаносибан дар ҳаҷми 100 ва 50 доллари амрикоӣ муайян гардида буд, 1 баробар зиёд шуда, аввалӣ ба 200 ва дуввумӣ ба 100 доллари амрикоӣ расонида мешавад. Аҳли толор ин иқдомро ҳамчун беҳтарин тӯҳфа ба ҷашни 60 солагии Академияи илмҳои Ҷумҳурии Тоҷикистон қабул карданд.Аз ҷониби Директори Пажўҳишгоҳи муттаҳидаи тадқиқоти ядроии Федератсияи Русия Виктор Матвеев ба Сарвари давлати Тоҷикистон Эмомалӣ Раҳмон барои нақши намоёнаш дар пуштибонӣ аз рушди илму техникаи муосир мукофоти олии ин муассисаи бонуфузи илмии Русия – медали тиллоӣ тақдим карда шуд.Зимни ин ҷамъомад ҳамчунин ҷоизаҳои давлатии Ҷумҳурии Тоҷикистон ба номи Абўалӣ ибни Сино дар соҳаи илму техника дар соли 2011 ба барандагони онҳо тақдим карда шуд.

Ноябрь 18, 2011 17:25

Хабарҳои дигари ин бахш

Тоҷикистон ислоҳоти муассир ва одилонаи воситаҳои молиявии байналмилалиро ҷонибдорӣ менамояд
Мактаб-интернатҳои ҷумҳуриявии шаҳри Ҳисор ба давраи тирамоҳу зимистон омода мебошанд
Дар Душанбе Мусобиқаи «Дави дӯстӣ» баргузор мегардад
Имрӯз дар шаҳри Душанбе ҳаво то 31 дараҷа гарм мешавад
Дар ноҳияи Сангвор бо афсарону сарбозон вохӯрии судманд баргузор гардид
HUAWEI маҳсулоти инноватсионии худро дар Париж муаррифӣ намуд
Имрӯз дар ноҳияҳои алоҳидаи Тоҷикистон чангу ғубор ба амал меояд
Дар шаҳри Новосибирски Русия гӯшаи забон ва адабиёти тоҷик ифтитоҳ ёфт
Имрӯз дар водиҳои Тоҷикистон ҳаво то 34 дараҷа гарм мешавад
Ҳаким Фирдавсӣ камоли бузургвории устод Рӯдакиро дар забону адаби мо дар «Шоҳнома» мавриди ситоиш қарор додааст
Оид ба пешниҳоди «Стратегияи миллии идоракунии партовҳо то соли 2040» ҷаласаи корӣ доир гардид
Имрӯз дар шаҳри Душанбе ҳаво то 32 дараҷа гарм мешавад