Дастгирии муассисаҳои маблағгузории кӯчак, хурд ва миёна

Душанбе, 27 январ. (АМИТ «Ховар», Покиза Маҳмадбекова). — 27 январи соли равон имзои Созишнома миёни Вазорати рушди иқтисод ва савдои Чумҳурии Тоҷикистон ва бонкҳои маблағгузории хурди «Арванд», «Ҳумо ва шарикон», «Оксус» ва «Феникс +» перомуни пешниҳоди маблағҳои қарзие, ки Ҳукумати Чумҳурии Федеролии Олмон ҷудо намудааст, дар доираи лоиҳаи «Рушди низоми молиявӣ дар минтақаҳои деҳот» баргузор гардид.  Ба хабарнигори АМИТ «Ховар» аз котиботи матбуотии вазорати рушди иқтисод ва савдо иттилоъ доданд, ки барнома ба мустаҳкам намудани бахши маблағгузории хурд тавассути дастгирии муассисаҳои маблағгузории кӯчак, хурд ва миёна равона шудааст. Мақсад аз татбиқи лоиҳаи мазкур беҳсозии дастрасӣ ба захираҳои молиявӣ мебошад. Ҳаҷми аввалаи маблағҳои грантии чудогардида ба 4,5 миллион евро баробар аст.