Машварати кории Сарвари давлат раисони вилоятҳо ва шаҳру ноҳияҳо
Душанбе, 30 март. (АМИТ «Ховар»). — Президенти кишвар Эмомалӣ Раҳмон бо раисони вилоятҳо, шаҳри Душанбе ва шаҳру ноҳияҳои тобеи ҷумҳурӣ, роҳбарони як қатор вазорату идораҳо ва масъулони Дастгоҳи иҷроияи Сарвари давлат машварати корӣ доир намуд. Дар машварат масоили вобаста ба вусъат додани киштукори баҳорӣ, пешгирии офатҳои эҳтимолии табиӣ ва омодагӣ ба тирамоҳу зимистони оянда баррасӣ шуд. Сарвари давлат Эмомалӣ Раҳмон бо назардошти тӯл кашидани зимистони имсола ва қафо мондани оғози киштукори баҳорӣ аз масъулини ҷумҳуриявию маҳаллӣ талаб намуд, ки аз ҳар рӯзи офтобӣ ва ҳавои мусоид пурсамар истифода баранд, то ки тамоми заминҳои корам кишт карда шаванд. Таъкид гардид, ки барои ин ба кишоварзон ҳамаҷониба кумак бояд кард. Ба андешаи Эмомалӣ Раҳмон, зимистони тӯлонии гузашта ва мушкилоти зиёди пешовардаи он, хусусан барои чорводорон собит намуд, ки захираи дусолаи маводи ғизоӣ ва сӯзишворӣ доштан то чи андоза зарур аст. Аз ин хотир таъкид гардид, ки аз ҳозир барои афзун намудани истеҳсоли маҳсулоти кишоварзию саноатӣ ва фаровон захира намудани он барои зимистон аз тамоми имкону захираҳои мавҷуда истифода карда шавад. Ба роҳбарони тамоми шаҳру ноҳияҳо ва масъулини ҷумҳуриявӣ дастур дода шуд, ки барои огоҳсозии мардум аз хатари обхезию дигар офатҳои табиӣ ва амалисозии чораҳои саривақтӣ ситодҳои доимамалкунанда таъсис дода, онҳоро бо мутахассисони кордон ва техникаю таҷҳизоти зарурӣ таъмин намоянд. Супоришҳои мушаххас, ҳамчунин доир ба вусъат додани корҳои созандагию ободонӣ, ба таври шабонарӯзӣ ба роҳ мондани фаъолияти корхонаҳои саноатӣ, дастгирии ҳамаҷонибаи соҳибкорон ва муҳайёсозии ҷойҳои нави корӣ дода шуд.Дар ин бора ба АМИТ «Ховар» аз Хадамоти матбуоти Сарвари давлат иттилоъ доданд.