Намоишгоҳи шогирдони мактаби миниатюраи тоҷик

Душанбе, 20 март. (АМИТ «Ховар», Музаффар Рустамов).- 27 марти соли 2012 бо кӯмаки молиявии шӯъбаи Ташкилоти байналмилалии Институти «Ҷамъияти Кушода»- Бунёди Мадад дар Тоҷикистон дар Нигорхонаи ҳунарии «Мино», ки дар бинои Иттифоқи меъморони Тоҷикистон ҷойгир аст, намоиши ҳунари иштирокчиёни лоиҳаи «Лоза» (ток)-и мактаби хусусии миниатюраи тоҷики рассом Олим Камолов ифтитоҳ мегардад. Мактаби миниатюраи тоҷик соли 2009 бо кӯмаки молиявии шӯъбаи Ташкилоти байналмилалии Институти «Ҷамъияти Кушода»-Бунёди Мадади Будапешт таъсис ёфта, заминаи бунёди Маркази ҳунари рассомии «Мино» гардид. Тӯли ду сол дар мактаби мазкур 25 нафар таҳсил доранд, ки дар байни онҳо 10 нафар хонандаи боистеъдод аз мактаб-интернати № 4-и шаҳри Душанбе ройгон ба таълим фаро гирифта шудаанд. Шогирдони мактаби номбурда дар фестивалҳои ҷумҳуриявӣ ва намоишгоҳҳои кӯдаконаи байналхалқӣ дар Қазоқистон, Ӯзбекистон, Қирғизистон, Эрон ва ИМА бомуваффақият иштирок кардаанд.2 сентябри соли 2011 ба Маркази ҳунари рассомии «Мино» сертификати мақоми клуби ЮНЕСКО дода шуд.