Вохӯрии Рустами Эмомалӣ бо доварон

Душанбе, 18 апрел. (АМИТ «Ховар», Пайрав Назаров). – Президенти Федератсияи футболи Тоҷикистон Рустами Эмомалӣ бо довароне, ки хидматрасонии бозиҳои мусобиқоти ҷумҳурӣ дар Лигаи олиро ба ӯҳда доранд, сӯҳбат намуд. Роҳбари Федератсияи футболи Тоҷикистон ба доварон масъулияту вазифаҳояшонро дар давраи мусобиқот бори дигар хотирнишон сохт. «Мо ба Кумитаи доварони Федератсия боварии комил дошта ва умедворем, ки шумо дар ҷараёни мусобиқот зимни хидматрасонӣ боэътимоду озодона рафтор мекунед. Шуморо даъват менамоям, ки дар ин мавсими мусобиқот бо камоли кордонӣ кор кунед. Бигузор дастаҳое ғолибони мусобиқоти Тоҷикистон оид ба футбол гарданд, ки аз бисёр ҷиҳат шоистаи он бошанд», — гуфт Рустами Эмомалӣ.Дар мулоқот ноиби аввали президенти Федератсияи Футболи Тоҷикистон Валерий Турсунов, дабири кулли Федератсия Фирдавс Файзуллоев ва раиси Кумитаи доварони Федератсияи Футболи Тоҷикистон Абдураҳим Бобоев низ ширкат доштанд.