22 ҳазор нафар соҳиби кор шуданд

Хоруғ, 16 июл. (АМИТ «Ховар», Л.Додо ). – Рӯзи 13 – уми моҳи июл дар толори театри вилоятии шаҳри Хоруғ маъракаи ба хатмкардаҳои Мактаби маълумоти касбӣ ва давомдори Донишгоҳи Осиёи Марказӣ супоридани шаҳодатномаҳо баргузор гардид. Ба ин муносибат муовини аввали раиси ВМКБ Исмоил Орифшоев, вазири меҳнат ва шуғли аҳолии ҷумҳурӣ Маҳмадамин Маҳмадаминов, Алмаз Сайфуддинов – намояндаи сафоратхонаи Амрико дар ҷумҳурӣ, директори Донишгоҳи Осиёи Марказии Багдан Кравченко, Абдулҳаким Ҳайдарӣ — намояндаи консулгарии Ҷумҳурии Исломии Афғонистон дар шаҳри Хоруғ хатмкунандагонро табрику таҳният гуфта, қайд карданд, ки ин воқеаи муҳим яке аз рукнҳои асосии пешрафти Донишгоҳи Осиёи Марказӣ ба ҳисоб меравад.Мактаби маълумоти касбӣ ва давомдори Донишгоҳи Осиёи Марказӣ дар шаҳри Хоруғ соли 2006 таъсис ёфт ва то имрӯз таи 22 ҳазор нафар онро хатм карданд. Дар мактаби номбурда асосан он пешаҳое омӯхта мешаванд, ки дар саросари дунё ба кор меоянд. Умуман, дар мактаби номбурда тибқи омӯзиш аз рӯи 30 касб машғулиятҳо мегузаронанд. Соли ҷорӣ дар 16 — гурӯҳ 173 нафар касб омӯхтанд, ки 21 нафари онҳо аз Ҷумҳурии Исломии Афғонистонанд.