Афзоиши активҳои «Амонатбонк»

Душанбе, 13 июл. (АМИТ «Ховар», Покиза Маҳмадбекова). – «Активҳои Бонки давлатии амонатгузории (БДА) «Амонатбонк» то имрӯз ба як миллиарду 171 миллион сомонӣ расидаанд, ки дар муқоиса ба ҳамин давраи соли гузашта 53,2% зиёд мебошанд», — иброз дошт 12 июл зимни нишасти матбуотӣ раиси БДА «Амонатбонк» Гулнора Ҳасанова. Вай афзуд, ки сармояи «Амонатбонк» дар ин муддат ба маблағи 148,5 млн. сомонӣ расид, ки ин нисбат ба ҳамин давраи соли гузашта 16,3% зиёд аст. Аз рӯи натиҷаи ҷамъбасти нимсолаи аввали соли равон даромад то андозбандии ба маблағи 13,2 млн. сомонӣ ва баъди андозбандӣ 9,9 млн. сомониро ташкил дод, ки нисбат ба ҳамин давраи соли гузашта 3,6 маротиба зиёд мебошад. «Дар шаш моҳи соли равон гардиши умумии ҳисоббаробаркуниҳо бо асъори миллӣ да ҳудуди ҷумҳурӣ 28,7 млрд. сомониро ташкил дода, нисбат ба ҳамин давраи соли гузашта ба андозаи 3,2 маротиба зиёд шуд», — тазаккур дод раиси «Амонатбонк».